Leviticus 25 — Amharic Tigrinya 2011

1እግዚኣብሄር ድማ ንሙሴ ኣብ ከረን ሲና ኸምዚ ኢሉ ተዛረቦ።

2ንደቂ እስራኤል ተዛረቦም በሎም ከኣ፡ ኣብታ ኣነ ዝህበኩም ምስሪ ምስ ኣቶኹም፡ እታ ምድሪ ንእግዚኣብሄር ሰንበት ተብዕል።

3ሹዱሽተ ዓመት ግራትካ ዝራእ ሹዱሽተ ዓመት ከኣ ወይንኻ ጠጥፍ፡ ፍሬኣ ድማ ኣክብ።

4በታ ሳብዐይቲ ዓመት ግና ነታ ምድሪ ሰንበት ዕረፍቲ፡ ሰነበት እግዚኣብሄር ይኹን፡ ግራትካ ኣይትዝራእ ወይንኻውን ኣይትጠጥፍ።

5ባልጋ ቐሪምካ ኣይትዕጸድ፡ እቲ ኸይጠጠፍካዮ ዝፈረየ ኣስካል ወይንኻ ድማ ኣይትቐንጥብ። ነታ ምድሪ ዓመት ሰነበት ዕረፍቲ ይኹን።

6ሰንበት እታ ምድሪ ንኣኻን ንግዙእካን ንግዝእትኻን ንወዓላይካን ነቲ ምሳኻ ዝነብር ስደተኛን ምግብኹም ይኹን።

7ኩሉ ፍሬኣ ንማልካን ኣብ ምድርኻ ንዘለው እንስሳን ቀለብ ይኹን።

8ድማ ሾብዓተ ሰናብቲ ዓመታት፡ ንኣኻ ሾብዓተ ሳዕ ሾብዓተ ዓመት ጌርካ ቖጸር፡ ዘበን እቲ ሾብዓተ ሰናብቲ ዓመታት ኣርብዓን ትሽዓትን ዓመት ይኹነልካ።

9ሽዑ ኣብ ሳብዐይቲ ወርሒ ብዓስረይቲ መዓልቲ መለኸት ንፋሕ፡ ብመዓልቲ ዕርቂ ኣብ ብዘላ ሃገርኩም መለኸት ንፍሑ።

10ነታ መበል ሓምሳ ዓመት ቀድስዋ፡ ኣብታ ምድሪ ኸኣ፡ ኣብኣ ንዝነብሩ ኹሎም ሓርነት ኣውጁ። እዚኣ ዓመት እልልታ ትኹነልኩም ነፊስ ወከፍኩም ነናብ ርስቱ ይመለስ፡ ነፍሲ ወከፍኩም ከኣ ነናብ ዓሌቱ ይመለስ።

11እዛ መበል ሓምሳ ዓመት እዚኣ ዓመት እልልታ ይኹነልኩም፡ ኣይትዝርኡ፡ እቲ ባሊጉ ኣባኣ ዘበቖለ ኸኣ ኣይትዕጸዱ፡ እቲ ዘይተጠጠፈ ወይኒ ድማ ኣይትቐንጥቡ።

12እዚኣ ዓመት እልልታ እያ ኣሞ፡ ቅድስቲ ትኹነልኩም። ካብ ግራት ዝኣተወ ብልዑ።

13በዛ ዓመት እልልታ ነፍስ ወከፍኩም ነናብ ርስቱ ይመለስ።

14ገለ ንብጻይካ እንተ ሸጥካሉ፡ ወይ ካብ ኢድ ብጻይካ ገለ እንተ ተሻየጥካ፡ ሓደ እኳ ንሓው ኣይዐምጽ።

15ብቑጽሪ ዓመታት ድሕሪ ዓመት እልልታ ኻብ ብጻይካ ተሻየጥ፡ ንሱ ድማ ብቑጽሪ ዓመታት ፍረ እዩ ዢሸጠልካ እሞ፡ ብመጠን ምብዛሕ ዓመታት ዋጋ ኣውሕድ።

16ኣነ እግዚኣብሄር ኣምላኽኩም እየ እሞ፡ ሓደ እኳ ንብጻዩ ኣይዐምጽ፡ ንኣምላኽካ ደ ፍራህ።

17ኣነ እግዚኣብሄር ኣምላኽኩም እየ እሞ፡ ሓደ እኳ ንብጻዩ ኣይዐምጽ፡ ንኣምላኽካ ደ ፍራህ።

18ሓጋጋተይ ግበሩ ፍርድታተይውን ሓልውን ግበርዎን። ኣብታ ሃገር ድማ ብህድኣት ክትነብሩ ኢኹም።

19እታ ምድሪ ኸኣ ፍሬኣ ትህብ እሞ፡ በሊዕኩም ትጸግቡ፡ ኣብኣውን ብህድኣት ትነብሩ።

20እንሆ ኣይዘራእናን ፍረ ድማ ኣየእቶናን፡ በታ ሳብዐይቲ ዓመት ደኣ እንታይ ክንበልዕ ኢና፡ ኣንተ በልኩም፡

21ሽዑ በታ ሳድሰይቲ ዓመት በረኸተይ ክእዝዘልኩም እየ፡ ንሰለስተ ዓመት ዝኸውን ፍረ ኸኣኣ ከተፍርየልኩም እያ።

22በታ ሳምነይቲ ዓመት ድማ ክትዘርኡ ኢኹም፡ ካብ ነባር እኽሊ ኸኣ ክትበልዑ ኢኹም። ክሳዕ እታ ታስዐይቲ ዓመት፡ ፍሬኣ ኽሳዕ ዚአቱ፡ እቲ ነባር ክትበልዑ ኢኹም።

23ምድሪ ናተይ እያ ንስኻትኩም ከኣ ምሳይ እትነብሩ ጓኖት ኢኹም እሞ፡ ምድሪ ንሓዋሩ ኣይትሸየጥ።

24ኣብ ብዘላ ምድሪ ርስትኹም፡ እታ ምድሪ ብዋጋ ተበጀውዋ።

25ሓውካ እንተ ተሸገረ እሞ ካብ ርስቱ ገለ እንተ ሸጠ፡ እቲ ዚቐርቦ ዘመዱ መጺኡ ነቲ ሓው ዝሸጦ ይበጀዎ።

26ዚብጀዎ ዘመድ ኣንተ ዜብሉ፡ ንሱ ግና ኢዱ እንተ መልኣሉ፡ ንምብጃው ዚኣኣክልውን እንተ ረኸበ፡

27እተን እተሸጠትለን ዓመታት ይቑጸር፡ እቲ ዝተረፎ ነቲ እተሻየጠ ሂቡ፡ ናብ ርስቱ ይመለስ።

28ንምምለሲኡ ዚኣክል ኣብ ኢዱ እንተ ዘይረኸበ ግና፡ እቲ እተሸጠ ኽሳዕ ዓመት እልልታ ሓራ ይውጻእ፡ ንሱ ድማ ናብ ርስቱ ይመለስ።

29ሰብ ኣብ እተዐርደት ከተማ ዘላ ቤት እንተ ሸጠ፡ ኣታ ዝሸጠላ ዓመት ክሳዕ እትመልእ ይበጀዋ፡ ጊዜ ምብጃዋ ዓመት ምሉ ይኹን።

30ክሳዕ ምሉእ ዓመት እንተ ዘይተበጀወት ከኣ፡ እታ ኣብ እተዐርደት ከተማ ዘላ ቤት ንሓዋሩ ነቲ እተሻየጣ ንውሉድ ወለዶኡ ትኹን፡ ብዓመት እልልታ ሓራ ኣይትውጽእን።

31ኣብ ዙርያኤን ቁጽሪ ኣብ ዜብለን ዓድታት ዘለዋ ሰበይቲ ግና ምስ ግራውቲ ሃገር ይተሓሰብ፡ በጃ ይውሀበን፡ ብዓመት እልልታ ድማ ሓራ ይውጽኣ።

32ብዛዕባ ኸተማታት ሌዋውያን ግና፡ ነተን ኣብ ከተማታት ርስቶም ዘለዋ ኣባይቲ ኺብጀውወን፡ ንሌዋውያን ናይ ዘለኣለም ስርዓት ይኹን።

33እተን ኣብ ከተማታት ሌዋውያን ዘለዋ ኣባይቲ ኸኣ፡ ንሳተን ኣብ ማእከል ደቂ እስራኤል ርስቶም እየን እሞ፡ ሓደ ኻብ ሌዋውያን እንተ ተበጀወ፡ ሽዑ እታ እተሸጠት ቤትን ኣታ ናይ ርስቱ ኸተማን ብዓመት እልልታ ሓራ ይውጽኣ።

34ኣብ ዙርያ ኸተማታቶም ዘላ ግራት ግና፡ ናይ ዘለኣለም ርስቶም እያ እሞ፡ ኣይትሸየጥ።

35ሓውካ እንተ ደኸየ እሞ ምሳኻ ኸሎ ኢዱ እንተ ሓጸሮ፡ ከም ጓናን ከም ጽጋዕተኛን ምሳኻ ይንበር።

36ካብኡ ሓረጣ ወይ ረብሓ ኸኣ ሳኻ ይንበር።

37ገንዘብካ ብሓረጣ ኣይትሀብ፡ እኽልኻ ኸአ ብረብሓ ኣይትሀቦ።

38ኣምላኽ ክኾነልኩምን ምድሪ ኸነኣን ክህበኩምን፡ ካብ ምድሪ ግብጺ ዘውጻእኩኹም ኣነ እግዚኣብሄር ኣምላኹም እየ።

39ሓውካ ድማ ምሳኻ ኸሎ እንተ ደኸየ፡ ርስቱ ኸኣ እንተ ሸጠልካ፡ ከም ባርያ ጌርካ ኣይትግዝኣዮ፡

40ከም በዓል ዕስብን ከም ጸጋዕተኛን ምሳኻ ይንበር። ክሳዕ ዓመት እልልታ የገልግልካ።

41ሽዑ ንሱ፡ ደቁ ድማ ምስኡ፡ ካባኻ ሓራ ይውጻእ እሞ፡ ናብ ዓሌቱ ይመለስ፡ ናብ ርስቱ ኣቦታቱ ኸኣ ይመለስ።

42ካብ ምድሪ ግብጺ ዘውጻእክዎም ባሮተይ እዮም እሞ፡ ባርያ ኸም ዝሽየጥ ኣይሸየጡ።

43ኣበርቲዕካ ኣይትግዝኣዮ፡ ንኣምላኽካ ደኣ ፍራህ።

44ንኣኻ ዚኾነ ተባዕታይ ባርያን ኣንስተይቲ ባርትያን ግና ኣብ ዙርያኹም ካብ ዘለው ህዝብታት፡ ካባታቶም ተባዕታይ ባርያን ኣንስተይቲ ባርያን ተሻየጡ።

45ካብ ደቂ እቶ ምሳኻትኩም ዚነብሩ ጓኖት፡ ካባታቶምን ኣብ ሃገርኩም ካብ እተወልዱ ዓሌቶምን ተሻየጡ፡ ጥሪት ይኹኑኹም።

46ብድሕሬኹም ድማ ንደቅኹም ከም ጥሪት ርስቲ ኣውርስዎም፡ ብኣታቶም ንዘለኣለም ክትግልገሉ ኢኹም። ብናይ ኣሕዋትኩም ደቂ እስራኤል ግና ሓደ እኳ ንሓው ኣበርቲዑ ኣይግዝኣዮ።

47ጓና ወይ ምሳኽ ዘሎ ጸጋዕተኛ እንተ ሀብተመ፡ ሓደ ሓውካ ኸኣ ምስኡ ኸሎ እንተ ደኸየ እሞ ንርእሱ ኣብቲ ምሳኻ ዚነብር ጓና ወይ ኣብ ሓደ ኻብ ዓሌት ጓና እንተ ሸጠ።

48ድሕሪ ምሻጡ ይበጀዎም፡ ሓደ ኻብ ኣሕዋቱ ይበጀዎ።

49ሓው ኣቡኡ ወይ ወዲ ሓው ኣቡኡ ይበጀዎ፡ ወይ ኣብ ኢዱ እንተ ረኸበ፡ ንርእሱ ይበጀዋ።

50ካብታ እተሸጠላ ዓመት ክሳዕ ዓመት እልልታ ምስቲ እተሻየጦ ኾይኑ ይጸብጽብ፡ እቲ ዋጋ መሸጣኡ ብመጠን ቁጽሪ ዓመታት ይኹን፡ ከም መጠን መዓልትታት ወዓላይ ምስኡ ይኹን።

51ገና ብዙሕ ዓመታት እንተሎ፡ ብእኤን መጠን ዋጋ መበጀዊኡ ኻብቲ ገንዘብ መሸጣኡ ይምለስ።

52ክሳዕ ዓመት እልልታ ቕሩብ ዓመታት ተሪፉ እንተሎ፡ ምስኡ ጸብጺቡ ኸም መጠን ዓመታቱ ዋጋ መበጀዊኡ ይምለስ።

53ከም ዓሰባ ዓመት ንዓመት ምስኡ ይኹን፡ ኣብ ቅድሚ ዓይንኻ ኣበርቲዑ ኣይግዝኣዮ።

54በዚ እንተ ዝይተበጀወ ኸኣ፡ ንሱ ደቁ ኸኣ ምስኡ ብዓመት እልልታ ሓራ ይውጽኡ።

55ደቂ እስራኤል ባሮተይ እዮም እሞ፡ ንሳቶም ካብ ምድሪ ግብጺ ዘውጻእክዎም ባሮተይ እዮም። ኣነ እግዚኣብሄር ኣምላኽኩም እየ።