Zechariah 5

Amharic Gofa GFBLVF (Geeshsha Maxaafa)

1Qassi taani dhoqu gada xeelliya wode bollara piradhiya issi xaatha maxaafa be7as.

2Kiitanchoy tana, “Neeni ay be7ay?” yaagidi oychis. Taani zaarada, “Taani bollara piradhiya issi xaatha maxaafa be7ayis; he maxaafa adussatethay laatamu wadha qassi gompay tammu wadha” yaagas.

3I taako, “Ha xaatha maxaafaa giddon biitta ubbaa bolla yaana baadethay xaafetis. He maxaafan issi baggara, ‘Kayso ubbay biittafe dhayana’; qassi hanko baggara, ‘Wordon caaqiya ubbay dhayana’ giya xuufey xaafetis.

4‘Taani ha baadetha kiittana; he baadethay bidi, kaysuwa soonne ta sunthan wordo caaqeysa soo gelana. He keetha gelidi mithaanne shuchaa dhaysana’ ” yaages Ubbaafe Wolqaama Goday.

5Hessafe guye, taara haasaya kiitanchoy taako yidi, “Ane dhoqu gada, yaabay aybeko be7a” yaagis.

6Taani, “I aybee?” yaagada oychas. I zaaridi, “Haysi makiya daacho” yaagis. Qassi gujidi, “Haysi asay ha biitta ubban oothida naaquwa malaata” yaagis.

7Irsaase geetetiya biratape oosetida daachuwa kamaa denthiya wode issi maccasi daachuwan uttasu.

8Kiitanchoy, “Hanna iitatetha leemiso” yaagis. Iyo guye daachuwan yeggidi irsaase kamaa zaaridi kammis.

9Hessafe guye taani dhoqu gada xeelliya wode enta qefiyan carkoy de7iya, piradhiya nam7u maccasata be7as. Enta qefey gollo qefe mela mino; enti daachuwa sa7ape dinthidi ekidi piradhidosona.

10Taani kiitanchuwako, “Haysati daachuwa awu efoona?” yaagada oychas.

11I zaaridi, “Enti iyaw keethe keexanaw Sana7oora biitta efoosona. Keethay keexeti simmiko enti he daachuwa iyaw giigida bessan wothana” yaagis.

← Chapter 4 Chapter 6 →