Song of Solomon 5

Amharic Gofa GFBLVF (Geeshsha Maxaafa)

1Ta miche, ta mushurate, taani ta atakiltiya giddo gelas. Ta karbiyanne ta shitto ciishsha qoras; taani eessa uythi mas; ta woyniyanne ta maatha uyas. Iya laggeto, miite uyite; siiqo alana gakanaw uyite.

2Taani dhiskas; shin ta wozanay barkis; ta siiqoy haysada yaagidi pengiya qonkishin si7as. “Ta miche, ta siiqe, ta yegelsse; borey bayna ta holle, taw pengiya dooya. Ta huuphey akan laakis; ta binaanay qamma puusen irxis.”

3Ta ma7uwa qaaras, zaarada ma7oyee? Ta tohuwa meecetas, zaarada qitayoyee?

4Ta siiqoy ibitha xoo7era ba kushiya soo yeddis; ta wozanay iya gisho seellees.

5Ta siiquwas dooyanaw dendas; pengiya dooyanaw kobiya oykiya wode, ta kushiyape karbey, ta biradhiyafe shittoy xokees.

6Ta siiquwas kariya dooyas, shin I deenna; iya qaala si7anaw daro amottas. Minthada koyas, shin iya demmabike; xeegas, shin taw koybeenna.

7Katamaa naageysati tana demmidi, wadhidosona; madunxisidosona. Katamaa dirsaa naageysati, ta laxana qaari ekidosona.

8Hinteno, Yerusalaame geela7oto, ta siiquwa demmiko, taani iya siiquwan hargidaysa, hadara iyaw odite.

9Neno, maccasa ubbaafe lo77iyara, ne laggey haratape waanidi dummatii? Neeni nuna hadara gey, I haratape aybin dummatii?

10Ta siiqoy mala lo77onne ayanta; tammu mukulu addeta giddon iya meli baawa.

11Iya huuphey al7o worqa daanees; iya binaanay lo77onne quuro mela kareethi.

12Iya ayfey shaafa matan eqida, maathan meecetida holleta daanees.

13Iya shakalay sawiya qimamey toketida madabeda lo77ees; iya mettershay karbe shittoy xokiya wora ciishshada lo77ees.

14Iya qesey al7o shuchan alleeqetida worqa xam7ada lo77ees; iya asatethay sanpare al7o shuchan alleeqetida dangarsa zaale mela.

15Iya tohoti worqa baason eqida salo shucha tuussi daanosona; iya malay zigan alleeqetida Libaanose zuma mela.

16Iya doonay eessada mal7ees; iya kumetha asatethay lo77ees. Hinteno Yerusalaame geela7oto, ta siiqoynne ta laggey haysa daannes.

← Chapter 4 Chapter 6 →