Psalms 82

Amharic Gofa GFBLVF (Geeshsha Maxaafa)

1Xoossay salo shiiquwa giddon, xoossati shiiqida bessan haysada yaagidi pirdees.

2“Hinte awude gakanaw wobbe pirdanee? awude gakanaw iitata bagga gidanee?”

3Metootanchotasinne aawi baynaysatas mootetite; manqotanne qohetida asaa maata naagisite.

4Daaburanchotanne metootanchota ashshite; iitata kushepe enta yegisite.

5Hintew eratethinne akeeki baawa; enti dhuman simeretoosona; biitta baasoti qaaxidosona.

6Taani, “Hinte xoossata; ubbay Ubbaafe Dhoqa Xoossaa nayta.

7Gidoshin hinte asi hayqeysada hayqana; hara halaqati kundeysada kundana” yaagas.

8Xoossaw, denda; biitta bolla pirda; kawotethati ubbay nebaa.

← Chapter 81 Chapter 83 →