Psalms 73

Amharic Gofa GFBLVF (Geeshsha Maxaafa)

1Tuma Xoossay Isra7eeles lo77o; wozana geeshshatas I keeha.

2Shin ta tohoy dhubetanaw guuthu attis; ta tangoy hallixanaw matis.

3Hessi haniday iita asatinne otoranchoti, duretishin taani be7ada qanaatida gishosa.

4Enta waayey gakonna gisho, enta asatethay payyanne mino.

5Enti hara asada waayetokona; hara asada meton shocetokona.

6Hessa gisho, otoroy entaw qoodhe alleeqo mela; buqethi afilada ma7idosona.

7Enta wozanay iitabaa pultees; enta qofay iita halchon kumis.

8Enti qelqisoosona; iitabaa haasayoosona; banta otoruwan harata un7ethoosona.

9Banta doona Xoossaa bolla dooyosona; banta inxarsaa asa bolla adussosona.

10Hari attoshin, Xoossaa asay entako simmana; enti odiyaba eeson ammanana.

11Enti, “Xoossi ayko erii? Ubbaafe Dhoqa Xoossaas eratethi de7ii?” yaagosona.

12Hiza iitati haysa mela; ubba wode injetin de7oosona; enti guji guji duretoosona.

13Hiza taani ta wozanaa geeshshatethan naagiday, xillotethi bessanaw ta kushiya meecetiday mela.

14Gallasa kumethi taani meton shocetas; wonta wonta seeretas.

15Taani iita asatada odetidaako, ne asaas ammanetona attanashin.

16Taani ha ubbaa eranaw qopiya wode, taw deexo gidis.

17Hessika taani Xoossa keethaa gelana gakanawunne iita asata wursetha qaada akeekana gakanaasa.

18Tuma neeni enta hallixiya bessan utisadasa; enti kundidi dhayana mela oothaasa.

19Enti ellesidi dhayidosona; dagaman issoy attonna wuridosona.

20Amuhoy barkiya wode baleteysada, abeeti Godaw, neeni dendiya wode, enti dogetana.

21Taani yilotida wodenne ta wozanan cametida wode,

22akeekona eeya asi gidas; ne sinthan mehe gidas.

23Shin taani ubba wode neera de7ayis; ta ushacha kushiya neeni oykadasa.

24Ne zoriyan tana kaalethaasa; wursethan tana bonchon ekaasa.

25Taw salon neepe attishin, hari ooni de7ii? Taani neepe attishin, sa7an haraa amotike.

26Ta wolqaynne ta wozanay daaburanaw danda7ees; shin Xoossay ta wozanaa minotethaanne merinaw tana gakida saamaa.

27Neepe haakeysati dhayana; nena kaddeyisata ubbaa ne wursana.

28Shin taw Xoossaako shiiqoy lo77o; iya ooso ubbaa taani odana mela, Ubbaa Haariya Godaa qosetidi attiya besse oothas.

← Chapter 72 Chapter 74 →