Psalms 62

Amharic Gofa GFBLVF (Geeshsha Maxaafa)

1Xoossaa xalaalan ta shempo demmas; ta atotethay iyape yees.

2Iya xalaali ta zaallanne ta atotetha; I ta qosetiya attiya bessi gidiya gisho dagammike.

3Woddana haniya godaanne qaaxiya dirsi daaniya uraa wodhanaw, hinte awude gakanaw dendetii?

4Enti iya boncho bessaafe denthanaw koyoosona; enti wordon ufaytoosona. Banta doonan anjoosona; shin banta wozanan baaddoosona.

5Ta shempete! Xoossaa xalaala si77i gada naaga; ta ufaysay iyape yees.

6Iya xalaali ta zaallanne ta atotetha; taani qosetiya bessi gidiya gisho dagammike.

7Ta atotethaynne ta bonchoy Xoossana; I ta mino zaallanne ta miixaa.

8Asaw, ubba wode Xoossan ammanetite; I hintew geshe gidiya gisho, hinte qofaa iyaw odite.

9Asi, issi toho shempiya carko mela; gooba asi ubbay maaddonna hada. Mizaanen wothin enti carko mela; enti issi toho shempiya carkofe kawuyoosona.

10Bonqen ammanetofite; kaysoti shiishidi duretethan otortofite. Hinte duretethay darikoka, hinte wozana iya bolla wothofite.

11Xoossay issi toho odis; taani nam7u oda si7as; wolqi xoossasa.

12Merinaa siiqoy Xoossaba; Abeeti Godaw, ne asa ubbaas iya oosuwada oosuwada immana.

← Chapter 61 Chapter 63 →