Psalms 32

Amharic Gofa GFBLVF (Geeshsha Maxaafa)

1Iya nagaray atto geetetidaynne iya nagaray kametida uray anjetidaysa.

2Goday iya iitatethaa taybonna asi, iya qofan cimoy bayna asi anjetidaysa.

3Taani ta nagaraa paaxonna aggada, kumetha gallas oolidaysi, ta asatethaa daabursis.

4Gallasinne qamma ne kushey tana deexis; haathi dhayin bone awan melidibada, ta wolqay wuris.

5Taani ta nagaraa new paaxas; ta naaquwa neepe genthabike. “Ta nagaraa Godaas paaxana” yaagas; tana deexida nagaraa atto gadasa.

6Hessa gisho, xillo asi oonika, ne bentiya wode nena woosso; iita di7oy yaa wode he uraa gakenna.

7Ne taw qosetiya bessi; ne tana metope naagasa. Atotetha yethi yexiya asaa ta yuushuwan wothadasa.

8Xoossay, “Ta nena tamaarsana; ne baana ogiya bessaana; ta nena zorananne naagana” yaagees.

9Bixaalaninne puulon oyketonna; kiitetonna wozani bayna baquloda woyko parada hanopite.

10Iitatas waayey darana; shin Godan ammaneteyisata siiqoy kammana.

11Hinteno, xilloto, Godan ufaytitenne hashshu giite; hinteno, wozana suureto, ililite.

← Chapter 31 Chapter 33 →