Psalms 25

Amharic Gofa GFBLVF (Geeshsha Maxaafa)

1Abeeti Godaw, shempofe ta nena woossayis.

2Abeeti ta Xoossaw, ta nenan ammanetayis; tana yeellayopa; ta morketas tana aathada immofa.

3Nenan ufaysi ootheysati yeellatokona; shin gaasoy bayna geneysati yeellatana.

4Abeeti Godaw, tana ne ogiya bessa; ne geedo tana kaaletha.

5Tana ashshiya Xoossay nena gidiya gisho, ne tumatethaa tana kaalethanne tamaarsa; gallas kumetha ta nenan ufaysi oothayis.

6Abeeti Godaw, benipe de7iya ne qadhiyanne ne keehatetha hassaya.

7Ta na7atetha nagaraanne iitaba hassayopa; abeeti Godaw, ne keehatethaanne lo77otetha hassaya.

8Goday keehanne suure gidiya gisho; nagaranchota ba ogiya tamaarsees.

9Ashketa suuretethan kaalethees; entana ba ogiya tamaarsees.

10Godaa caaquwanne iya kiitaa naageysatas iya oge ubbay tumanne keeha.

11Abeeti Godaw, ta nagaray daro; gidoshin ne sunthaa gisho taw atto ga.

12Godaa yayiya asi oonee? I kaallanaw bessiya ogiya Goday iya tamaarsana.

13I ubba wode duretethan daana; iya nayti biitta laattana.

14Goday yayyeysatas ba xuuraa genthenna; I entaw ba caaquwa erisees.

15Goday ta tohuwa xihepe naagiya gisho, ta ayfey maado ekanaw ubba wode iyako xeellees.

16Godaw, taani bizzanne metootida asi gidiya gisho, taako simma; ne maarotethaa tana bessa.

17Taw hirgi daris; ta metuwape tana ne ashsha.

18Ta metuwanne ta waayiya be7a; ta nagara ubbaa atto ga.

19Ta morketi ay mela daridaako be7a; enti tana ay mela ixiyako xeella.

20Ne tana naaga; ne tana ashsha; ta neeko baqatiya gisho tana yeellayopa.

21Ta nenan ufaysi oothida gisho, suuretethinne tumatethi tana naago.

22Abeeti Xoossaw, Isra7eele asaa enta meto ubbaafe ne woza.

← Chapter 24 Chapter 26 →