Psalms 19

Amharic Gofa GFBLVF (Geeshsha Maxaafa)

1Saloti Xoossaa bonchuwa haasayoosona; salo gufanthoy iya kushe oosuwa awaajees.

2Issi gallasi hara gallassas hessa odees; issi qammi hara qammas eratethi qoncisees.

3Odi woyko qaali baawa; enta girsay si7etenna.

4Gidoshin enta oday sa7a ubban laaletis; enta qaalay biitta gaxaa gakis. Awi de7iya bessi Xoossay salon giigisis.

5Ba soope keyiya mishirada, gaadde woxanaw ufaytidi giigida asada, away wonta wonta keyees.

6Issi bagga salo gaxape keyidi, hara bagga salo gaxa gakanaw bees; iya suulape geemmiyabay baawa.

7Godaa higgey suure; shempo zaarees. Godaa kiitay ammanetidaysa; akeeki pacidaysata cinca oothees.

8Godaa wogay like; wozana ufaysees. Godaa kiitay geeshshi; ayfe poo7isees.

9Godaas yashshi geeshshi; merinaw eqidi de7ees. Godaa pirday kumethi tumanne xillo.

10Worqafe aadhidi koyetees; walahi bayna worqafe aadhidi lo77o. Eessafe aadhidi lo77o ililo eessafe aadhidi mal7o.

11Ne aylley naagetana mela zorees; ne higgiya naagoy daro go77ees.

12Ba qohuwa demmey oonee? Abeeti Godaw, geemmida nagarape tana geeshsha.

13Tana ne aylliya, erishe oothiya nagarape naaga. Nagari tana haaronna mela maadda; he wode taani suure gidana, gita balape geeyana.

14Abeeti Godaw, ta zaallaw, tana wozeyso; ta doonape keyiya qaalaynne ta wozanaa qofay nena ufaysiyabaa gido.

← Chapter 18 Chapter 20 →