Psalms 17

Amharic Gofa GFBLVF (Geeshsha Maxaafa)

1Abeeti Godaw, ta xillo maggannuwa si7a; taani neeko waassiya waasuwa hayza. Cimon gidonashin tuman, woossiya woosa zaara.

2Ne xillo pirday taw qonco; ne ayfey tumaa xeello.

3Neeni qamma tana xomoosadasa; ta wozanaa paacadasa. Shin paacadaka ta bolla aykoka demmabaaka; ta inxarsayka baletibeenna.

4Taani hara asatada iitabaa haasayike; taani ne qaala naagiya gisho, gene ogiya kaallabike.

5Ta tohoy dhubetonna mela, ta tangoy ne ogiyape gaxa keybeenna.

6Abeeti Xoossaw ta woosa ne si7iya gisho, taani nena woossayis. Ne haythaa taako zaarada, ta qaala si7a.

7Banta morketape baqateyisata, ne ushacha kushen qottada ashsheyso, ne keehatetha malaalsiya ogen bessa.

8Ne ayfe na77e mela tana naaga; ne qefiya garsan tana qosa.

9Tana un7ethiya iitatape; teqidi oykida morketape ashsha.

10Entaw qadhey baawa; otoron haasayoosona.

11Tana gooddidi oykidosona; teqidosona; tana biittan holidi yegganaw xeelloosona.

12Enti miyaba koyiya gaammo mela; qosetidi naagiya wodala gaammo mela.

13Godaw, denda; ta morketara eqetada enta sa7an yegga; ne mashshan iitata kushepe tana ashsha.

14Godaw, haysa mela asape tana qosa; enta qaaday sa7aba gidida asape ne kushen tana ashsha. Ne minjida seeran enta kalsa; he seeray enta naytas gididi, enta nayta naytas palaho.

15Shin taani xillotethan ne som7uwa be7ana; ta barkiya wode ne malaa be7ada ufaytana.

← Chapter 16 Chapter 18 →