Psalms 108

Amharic Gofa GFBLVF (Geeshsha Maxaafa)

1Ta wozanay minnidi de7ees; abeeti Xoossaw, ta wozanay minnidi de7ees. Ta new yexana; nena sabbana.

2Ta shempe, barka; diithinne maasinqoy denda; Ta wonta guura dendana.

3Abeeti Godaw, ta nena asaa giddon galatana; kawotethaa giddon nena sabbana.

4Ne merinaa siiqoy salope dhoqa; ne ammanetethay shaarape dhoqa.

5Abeeti Xoossaw, salope bollara ne dhoqu dhoqu ga; ne bonchoy sa7a ubbaa bolla gido.

6Ne doseysati attana mela, ne ushacha kushen nuna ashsha; neeni ta woosa si7a.

7Xoossay ba geeshsha bessan haysada yaagis; “Ta xoonada Seekema shaakana; Sukota zangaara gishana.

8Galadinne Minaasey tabaa; Efreemi ta huuphen wothiya uke; Yihudi ta kawota xam7aa.

9Moo7abey ta meecetiya gabate; Edoomey tabaa gideysa erisanaw ta caammaa iya bolla wothana. Filisxeeme xoonada gereerana” yaagis.

10Godaw, gimbetida katamaako, tana efanay oonee? Edoome gakanaw tana kaalethanay oonee?

11Abeeti Xoossaw, nuna aggiday nena gidikii? Abeeti Xoossaw, ne nu tooranchotara olas keyaka.

12Asa maadoy pathenna gisho, morkiya olanaw ne nuna maadda.

13Xoossaa wolqan nu morketa xoonana; nu morketa kawushanay iya.

← Chapter 107 Chapter 109 →