Psalms 102

Amharic Gofa GFBLVF (Geeshsha Maxaafa)

1Godaw, ta woosa si7a; ta waasoy neeko gako.

2Ta waayiya gallas ne som7uwa taape genthofa; ne haytha taako zaara; taani neeko waassiya wode, tana eeson alla.

3Ta laythay cuyada dhayees; ta meqethay tamada eexees.

4Ta wozanay buucidi yeggida maatada melis; kathika taw meetetenna.

5Taani ta qaala dhoqu oothada oolida gisho; ta gogay meqethaara oyketis.

6Taani woran de7iya solo mela, kaysa keethan de7iya gutto mela.

7Taani zin7in dhiskoy yeenna; taani keetha huuphen barka uttida kafo gidas.

8Ta morketi gallas kumethi tana cayoosona; tana qelqiseysati ta sunthan baaddoosona.

9Bidoy taw kathi gidis; ta afuthay ta ushshara Walaketis.

10Hessi haniday ne hanqoynne ne yiloy, tana denthadi wora holida gishosa.

11Ta laythay omarsa kuya mela ellesidi aadhees; taani maatada shullayis.

12Shin Godaw, neeni ne araatan merinaw uttadasa; ne sunthay yeletaape yeletaa gakanaw hassayetana.

13Neeni iyo maariya wodey gakida gisho; dendada Xiyoones qadheta; neeni doorida wodey gakis.

14I shuchati ne oosanchotas al7o; I biittayka enta qadhethees.

15Kawotethati Godaa sunthaas yayyana; sa7aa kawoti iya bonchuwas dagammana.

16Goday Xiyoone zaaridi keexana; ba gitatetha bessana.

17I manqota woosa si7ana; enta oysha kadhenna.

18Buroo yeletana asay Godaa galatana mela, haysi yaa yeletas xaafeto.

19Goday dhoqan de7iya ba geeshsha bessaafe xeellis; salon gididi sa7aa xomoosees.

20Hessika qashetida asaa waasuwa si7anawunne hayqo pirdetida asaa birshanaasa.

21Hessa gisho, Godaa sunthay Xiyoonen odetana; iya galatay Yerusalaamen awaajettana.

22Dereynne kawotethay shiiqidi, Godaas he wode goyinnana.

23Taani na7atethan de7ishin, ta wolqaa ixisis; ta laytha qaamisis.

24Taani, “Ta Xoossaw, ta laytha giddo zawan tana dhukofa” yaagayis. Godaw, neeni yeletape yeletaa gakanaw de7aasa.

25Neeni beni sa7aa medhadasa; saloyka ne kushe ooso.

26Haysati ubbay dhayana; shin neeni daana; enti ubbay afilada wurana. Neeni enta curqa afilada laammana; entika aadhana.

27Shin neeni nena; ne laythay wurenna.

28Ne aylleta nayta neeni saro wothaasa; enta kochay ne sinthan minnidi daana.

← Chapter 101 Chapter 103 →