Proverbs 22

Amharic Gofa GFBLVF (Geeshsha Maxaafa)

1Lo77o sunthi daro duretethafe aadhees; bonchoy birapenne worqafe aadhees.

2Durenne manqo Goday medhis; hessan enti nam7ay issino.

3Cinca asi iita be7idi qosetidi attees; shin akeeki bayna asi meton gelidi qohetees.

4Ashketethinne Godaa yashshi, duretethi, bonchonne de7o immees.

5Iitata ogen agunthinne xihey de7ees; shin bana naagiya asi entafe haakees.

6Na7i waanidi daanaw bessiyako tamaarsa; I cimiya wodeka iyape haakenna.

7Durey manquwa haarees; tal7e ekiday tal7e immidaysas aylle gidees.

8Nagara zeriya uray waaye cakees; iya hanqo xam7ay meqana.

9Ba kathaa manqotas shaakiya gisho keeha asi anjetana.

10Qelqisiya asi diggiko, palami, ooshshinne cashshi attana.

11Wozani geeshshi gidida asinne lo77o oda dosiya asi kawora dabbotees.

12Godaa ayfey eratethi naagees; shin wordanchota qaala shiri yeggees.

13Azalla asi, “Karen gaammoy de7ees; tana ogen maana” yaagees.

14Layma maccasa dooni wolqaama olla mela; Goday hanqetidaysati iyan kundoosona.

15Eeyatethi na7a wozanan de7ees; shin pircoy iyape haassees.

16Shalo shiishanaw manquwa naaqeynne dure asas imota immiya nam7ay manqana.

17Ne haytha zaarada cincata qaala si7a; ne wozanaa ta timirtiyako zaara.

18Enta ne wozanan wothikonne ne doonan enta haasayiko, ne ufaytana.

19Ne ammanoy Godan gidana mela, taani nena hachi tamaarsayis.

20Taani new zorenne eratethi kumida hastamu leemisota xaafas.

21Nena kiittidaysas like zaaro zaarana mela, taani nena tumatethi tamaarsas.

22Manqotas aybika bayna gisho, enta bonqofa; pirdan enta maata dhaysofa.

23Goday enta gisho mootetana; enta bonqidaysata I bonqana.

24Yilotiya uraara laggetopa; elle shenetiya uraara hemetofa.

25Neeni iya yiluwara meezetiko, guyepe agganaw danda7aka.

26Asa aco ta qanxana gada waase gidopa.

27Ne qanxiyaba dhayiko, ne zin7iya hiixay attonna, new de7iyaba ubbay eketana.

28Ne mayzati tokida beni zawa shoddofa.

29Ba oosuwan loohida asi be7adii? I coo asatas gidonashin kawotas oothees.

← Chapter 21 Chapter 23 →