Proverbs 18

Amharic Gofa GFBLVF (Geeshsha Maxaafa)

1Shaahetethi koyiya asi ba amuwa kaallees; suure qofa ubbaa ixees.

2Eeya asi ba qofaa xalaala qoncisanaw dosees; hara asape era ekanaw dosenna.

3Iitatethi yaa wode kadhey yees; kawushatethi yaa wode yeelli yees.

4Asa doonape keya odi, ciimmo haatha mela; cincatethi goggiya pulto mela.

5Naaqida uraa maaddidi, xilluwa pirdaa geellayeysi lo77o gidenna.

6Eeya asa odi ooshshu denthethees; iya doonay wadho xeegees.

7Eeya asa odi bana qohees; iya oday xihe gididi iya oykees.

8Zigirsi mal7o katha mela; ufaysishe duge ganje gakees.

9Azalla asi dhaysiya asape aybaka dummatenna.

10Godaa sunthay mino gimbe mela; xillo asi yaa woxidi saro attees.

11Dure asata duretethay gimbetida katama mela; enta qofan enta duretethay mino dirsada enta naagiyaba daanees.

12Otoroy kundethafe sinthatees; ashketethi boncho ehees.

13Si7onna de7ishe zaaro imoy, he uraas eeyatethinne yeella.

14Daana gidi qopiko, iya ayyaanay harge danda7isees; shin ufaysi qanxiko iya maaddey baawa.

15Akeeka asi eratethi koyees; cinca asa haythi cincatethi si7ees.

16Imoti immeysas oge dooyees; gita asatara erisees.

17Daynna sinthan koyro shiiqidi mootiya uray, iya morkey yin, iya oychana gakanaw, ubba wode bana xillo gidi qopees.

18Saama yegethi palama teqees; nam7u palamiya asata shaakees.

19Qohetida ishay gimbetida katamape aadhidi minnees; iya palamay birata gorde mela.

20Asi ba doona odan ba ulo kunthees; ba inxarsaa ayfen kallees.

21Hayqoynne de7oy inxarsana; neeni ne inxarsaa ayfiya maana.

22Macho demmiday lo77oba demmis; i, Godaape teema demmees.

23Manqo asi aaddashidi odetees; shin dure asi otoron zaarees.

24Daro laggey de7iya asi ba bolla meto ehees; shin ishape aadhidi matatiya laggey de7ees.

← Chapter 17 Chapter 19 →