bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Amharic
/
Amharic Gofa GFBLVF (Geeshsha Maxaafa)
/
Luke 24
Luke 24
Amharic Gofa GFBLVF (Geeshsha Maxaafa)
1
Saamintafe koyro gallas, wogga wode wonta daro guura, maccasati banta giigisida shittuwa ekidi duufuwa bidosona.
2
Enti yaa gakiya wode duufuwa doonan de7iya shuchay gonderetidi kichoysa demmidosona.
3
Enti duufuwa gaathi gelidosona, shin Godaa Yesuusa aha demmibookona.
4
Enti yan eqidi aybi hanide gidi qopishin akeekona daro phooliya afila ma7ida nam7u asati enta matan eqidosona.
5
Maccasati yashetidi banta huuphiya sa7an ziqi oothidi de7ishin, asati entako, “De7on de7eysa hayqota giddon ayis koyeetii?
6
I haysan deenna; hayqope dendis, ‘Asa Na7ay nagaranchota kushen aadhidi imetana; entika iya kaqana. I heedzantho qamman hayqope dendana’ yaagidi, I hintera Galilan de7ishe hintew odida qaala qopite” yaagis.
8
Maccasati he wode iya qaala qopidosona.
9
Maccasati duufuwape simmidi hanidaba ubbaa tammanne issotasinne haratasika odidosona.
10
Hessa hawaaretas odiday Magdela Mayraamo, Yohaana, Yayqooba aayiw Mayraamonne entara de7iya hara maccasata.
11
Shin entaw maccasati odidaysi elmo daanin ammanibookona.
12
Shin Phexroosi dendi woxidi duufo bis. He bessaa gakidi, hokidi gaathi xeelliya wode moogo afilaa xalaala be7is. Hanidaban malaaletishe ba soo simmis.
13
He gallas kaalliya tamaaretape nam7ati Yerusalaamepe tammanne issi kilo mitire haakiya Emahoose guta boosona.
14
Enti wolla hanidaba ubbaa odetoosona.
15
Enti he hanotaba qopishenne odetishe biya wode Yesuusi ba huuphen shiiqidi entara bees.
16
Hanoshin, enti iya eronna mela enta ayfey oyketis.
17
I, “Hinte wolla oge bolla de7ishe odeteysi aybee?” yaagis. Enti azzanidi si77i gidi eqidosona.
18
Entafe issoy Qeliyoophe geeteteysi, “Ha qammata giddon Yerusalaamen hanidaba eronnaysi, ne biittas imatheyee?” yaagis.
19
I zaaridi, “I hanidaysi aybee?” yaagidi oychis. Enti, “Xoossaa sinthaninne asa sinthan oosoninne odan mino nabe gidida Naazirete Yesuusaba.
20
Iya kahine halaqatinne haareysati hayqo pirdas aathi immidi, kaqidosona.
21
Nuuni Isra7eele asaa wozande gidi ufaytidi naagidashin haysi hanin hachi heedzantho qamma.
22
Qassi nu giddofe issi issi maccasati nuna malaalsidosona. Enti hachi wonta guura duufuwa bidosona.
23
Iya aha dhayida wode simmi yidi, ‘I paxa de7ees’ giya kiitanchoti qoncin be7ida yaagidi odidosona.
24
Nu giddofeka issoti issoti duufuwa bidi maccasati odidaysatho hanin be7idosona, shin iya be7ibookona” yaagis.
25
I entako, “Hinteno, akeekona asato, hinte wozanay nabeti odidaba ubbaa ammananaw gam7eysato,
26
Kiristoosi ha metuwa ekanawunne ba bonchuwan gelanaw bessennee?” yaagis.
27
Musepenne nabeta ubbaafe dendidi Geeshsha Maxaafan iyabay xaafetidaysa ubbaa entaw qoncisis.
28
Enti biya gutaako matatida wode Yesuusi aadhidi haaho soo biya daanin,
29
Enti, “Sa7ay qammida gisho nuura aqa” yaagidi minthidi woossidosona. Hessa gisho, entara aqanaw gelis.
30
Entara issife gayta bolla uttidi, uythaa denthidi, menthidi, anjidi entaw immis.
31
He wode enti erana mela enta ayfey dooyetis. Entika eridosona. Shin I entafe geemmis.
32
Enti, “Nu ogiya bolla de7ishin I nuus Geeshsha Maxaafaa birshishininne nuna odisishin, nu wozanay xuugetibeennee?” yaagidosona.
33
He wode dendidi guye Yerusalaame yidosona. Tammanne issotinne harati issi bolla shiiqidi de7ishin demmidosona.
34
Enti, “Goday tuma dendis; Simoonas qoncis” yaagidosona.
35
He nam7u tamaareti Emmahuuse ogiya bolla de7ishin hanidaysanne uythaa menthida wode waati iya eridaako entaw odidosona.
36
Nam7u tamaareti hessa oda bolla de7ishin, Yesuusi enta giddon eqidi, “Saroy hintew gido” yaagis.
37
Gidoshin, enti dagammidi, moytille be7ida daanin yayyidosona.
38
I entako, “Ayis babidetii? Ayis sidhey hinte wozanan gelidee?
39
Ta kushiyanne ta tohuwa be7ite; taani tana. Qassi oykidi be7ite; tanan hinte be7eysada, moytilles ashoynne meqethi baawa” yaagis.
40
Yaagidi, ba tohuwanne ba kushiya enta bessis.
41
Enti ufaysafe dendoysan ammanonna malaaletethan de7ishin, Yesuusi entako, “Haysan hintew miyabay de7ii?” yaagis.
42
Enti issi caacetida molo iyaw immidosona.
43
I ekidi enta sinthan mis.
44
I, “Ta hintera gam7ida wode ubban Muse maxaafatan, nabeta maxaafataninne Mazmure maxaafatan, ta gisho xaafetidabay ubbay poletanaw bessees yaagada ta hintew odida qaalay haysa” yaagis.
45
He wode Geeshsha Maxaafata akeekana mela enta wozanaa dooyis.
46
Hessadaka, “Kiristoosi waaye ekana, heedzantho qamman hayqope dendana yaagidi xaafetis.
47
Yerusalaamepe dendidi asaa ubbaas nagaraape maarotethaynne atotethay iya sunthan markatana.
48
Hinte hessas markata.
49
Heko, taka ta aaway immida ufaysaa hintew yeddana. Hinte salope wolqa ma7ana gakanaw Yerusalaame kataman gam7ite” yaagis.
50
Hessafe guye, Bitaane katamaa entana ekidi bis. Ba kushiya denthidi anjis.
51
Entana anjishe entafe shaaketidi pude salo eketis.
52
Enti ziggi goyinnidi daro ufaysan Yerusalaame simmidosona.
53
Xoossaa ubbaa wode galatishe xoossa keethan gam7idosona.
← Chapter 23