Job 42

Amharic Gofa GFBLVF (Geeshsha Maxaafa)

1Hessafe guye, Iyyobi Godaako haysada yaagidi zaaris;

2“Ne ubbaba oothanaw danda7eysanne ne qofaa teqanaw danda7ey baynaysa taani eras.

3Ne, ‘Eri bayna ta zoriya qosey oonee?’ yaagada tana oychadasa; tuma taani taw geliboonnaba, ta eraape bolla gidida malaalsiyaba odetas.

4“Neeni taako, ‘Taani odiya wode hayza; taani oychiya wode zaara’ yaagadasa.

5Taani kase nebaa haythan si7as; shin ha77i ta nena ayfen be7as.

6Hessa gisho, ta odan yellatada, bido bollanne baana bolla uttada paaxayis” yaagis.

7Goday hessa Iyyobas odidaape guye, Temaanape yida Elfaazako haysada yaagis. “Ta aylliya Iyyobada hinte tabaa like odetiboonna gisho, ne bollanne ne nam7u laggeta bolla ta hanqoy eexis.

8Hessa gisho, ha77i laapun kormatanne laapun marazeta ekidi ta aylliya Iyyobako bidi, xuussa yarsho hinte balas yarshite. Ta aylliya Iyyobi hintew woossana; taani iya woosa si7ada hinte hanuwa mela hintena seerike. Hinte ta aylliya Iyyobada tabaa like odibeketa” yaagis.

9Hessafe guye, Temaanape yida Elfaazi, Shuuhape yida Beldadoosinne Na7imape yida Soofari bidi, Goday enta kiittidaysada oothidosona. Goday Iyyoba woosa s7is.

10Iyyobi ba laggetas woossidaape guye, Goday iya zaaridi dureyis; iyaw kaseysa gisho nam7u kushe immis.

11Hessafe guye, iya ishati, iya michetinne kase iya ereysati ubbay iyako yidi, iya son iyara gibira midosona. Iyaw azzanidosona; Goday iya bolla ehida meto ubban iya minthethidosona; qassi iyaw biranne worqa sagaayo immidosona.

12Goday Iyyoba wursetha laytha koyro laythaafe aathidi anjis. Iyyobas tammanne oyddu mukulu dorsati, usupun mukulu gimaleti, issi mukulu waaxa booratinne issi mukulu macca hareti de7oosona.

13Qassi iyaw laapun adde naytinne heedzu macca nayti yeletidosona.

14Bayra macca na7iw Yimimo, nam7anthiw Qaxi7o, heedzanthiw Qerenhafuko yaagidi sunthis.

15Iyyoba macca naytada mala lo77o macca na7i awu biittan bentibeenna. Enta aawa entaw enta ishatara laata biitta immis.

16Hessafe simmin, Iyyobi xeetanne oytamu laythi de7is. Ba naytanne ba nayta nayta oyddantho yeletethaa gakanaw be7is.

17Iyyobi daro wode de7idi, lo77o cima cimidi hayqis.