Job 40

Amharic Gofa GFBLVF (Geeshsha Maxaafa)

1Goday Iyyobako zaaridi yaagis;

2“Iyyoba, asi Ubbaa Danda7iya Godaara mootetidi, lathanaw danda7ii? Ane Xoossara mootetiya uray iyaw zaaro” yaagis.

3Hessafe guye, Iyyobi zaaridi, haysada yaagis;

4“Godaw, taani pathonna laafa asi; ta doona bolla kushe wothada si77i gaanape attishin, new ay zaaro immanaw danda7iyana?

5Taani issi toho odas; shin taw zaariyabay baawa; nam7antho odas haraa gujike” yaagis.

6Hessafe guye, Goday gote giddon giddon gididi Iyyobako haysada yaagis.

7Addeda ne xeessaa dancada dendada, ta oyshaas zaaro imma.

8Ne tana bala asi kessana hanayee? New xillo gidanaw tana wordancho kessayee?

9Xoossa wolqaa mela wolqi new de7ii? Xoossay guummeysada ne guummanaw danda7ay?

10Hessa gidiko, ne bonchuwanne gitatetha ma7a; ne wolqaanne teemuwa gixa.

11Ne hanquwa gussa; ane otoranchota xeellada kawusha.

12Ane loytha xeellada otortiya ubbaa yeellaya; iitata ubbaa enti de7iya bessaafe dhaysa.

13Enta ubbaa biittan mooga; duufon yeggada enta bolla gorda.

14He wode ne wolqay nena ashshanaw danda7eysa ta markatana.

15Taani nena medhidaada medhida Bihemoota geetetiya do7a be7a; I boorada maata mees.

16Iya xeessan de7iya wolqaynne iya uluwa kammida shayaa minotethay daro.

17Iya goynay zigada bollan qaaxees; iya gedaa xaphoti minon dooqetidosona.

18Iya meqethay naase birata mela; iya geday birata kure mela.

19Xoossay medhida medheta ubbaa garsan I aadhees; taape attishin, hari iya xoonanaw danda7ey baawa.

20Do7i gupiya derey, iyaw miyaba dolisees.

21Mitha kuya garsan zin7ees; caren maqa giddon qosetees.

22Mithati banta kuyan iya genthoosona; shaafa gaxan dicciya mithati iya kammoosona.

23Shaafay kixidi goggey wode dagammenna; Yordaanose shaafay qoodhe gakanaw kumikoka I hirgenna.

24Iya ayfiya toysidi, iya oykanaw danda7iya asi de7ii? Iya siidhiya lukidi oykanaw danda7ey oonee?

← Chapter 39 Chapter 41 →