Job 17

Amharic Gofa GFBLVF (Geeshsha Maxaafa)

1Ta shempoy keyees; ta laythay qaammis; taw duufoy giigis.

2Ta bolla qelqiseysati ta yuushuwan de7oosona; enti tana yiloyida mela aysidosona.

3Abeeti Xoossaw, neepe hari tana maaddey bayna gisho, ne taw waase gida.

4Enti akeekona mela enta qofaa gordadasa; Hessa gisho, ne entaw xoono immofa.

5Miishe demmana gidi, ba laggeta aathidi immiya uraa nayta ayfey qooqana.

6Xoossay tana asas miichas aggis; asi cuttishe aadhiya asi gidas.

7Ta daro kayotida gisho ta ayfey eeyis; ta asatethay laafidi eesho gidis.

8Keeha asati tana be7idi dagammidosona; suureti Xoossaa ammanonayisata bolla yilotidosona.

9Gidoshin xilloti banta ogiyape deshokona; suureti wolqa guji guji boosona.

10Shin zaaridi ubbay taako haa yiite! ta hinte giddofe issi cinca asi demmike.

11Ta de7o laythay wuris; ta halchoy hada gidis; ta wozanaa amoy coo attis.

12Ta laggeti qamma gallas goosona; dhuma be7ishe ‘Poo7ana hanees’ yaagosona.

13Ta ufaysan naagiya keethay duufo; ta hiixa dhuman hiixayis.

14Duufoko, ‘Ne ta aawa’ yaagana; guxuneko, ‘Ne ta aayo woyko ta micho’ yaagana.

15Yaatin, taw ay ufaysi de7ii? taw ufaysi gidiyaba ooni demmanay?

16Ta ufaysay taara duufo bandee? Nu issife biittan duge gelanee?” yaagis.

← Chapter 16 Chapter 18 →