Jeremiah 17

Amharic Gofa GFBLVF (Geeshsha Maxaafa)

1“Yihuda nagaray birata biiren xaafetis; enta wozanaa bollanne yarsho bessan de7iya kaciya bolla almaaze geetetiya shucha xeeran xaafetis.

2Enta nayti irxa mitha garsan, zumata bollanne dereta bolla giigisida yarsho bessan Asheera geetetiya xoossees essida misiliya goyinnoosona.

3Hinte biitta bolla oothida nagaraa acuwa qanxisanaw hinte shaluwanne hinte miishiya hinte morketas immana.

4Hinte merinaw eexiya ta sheniya denthethida gisho, hintena laatisida biittafe shoddana; hinte eronna biittan hinte morketas aylle oothana” yaagees Goday.

5Goday haysada yaagees: “Asan ammanetey, asho ma7ida asan ceeqeteynne ba wozanaa Xoossafe haassey baadetidaysa gido.

6Hessa mela asi bazzon de7iya tushe mela; lo77obay yaa wode I be7enna. I bazzon, mela bessan, asi doonna maxine biittan daana.

7“Godan ammanetiya asi, iya ceeqoy Godaa gidida asi anjetidaysa.

8I haatha matan toketidi, ba xaphuwa goggiya haathan yeddida mitha mela. I awa suulas yayyenna. He mithaa haythay cil7oshin de7ees. Iri bukonna laythan hirgenna; ubba wode ayfe aggenna.

9“Asa wozani ubbaafe aadhidi cimmeesinne iita; iya gaatha qofaa ooni eranaw danda7ii?

10Taani Goday, asa ubbaas iya ogiyadanne iya oosuwada immanaw, asa wozanaa pilgayis; iya kahaa paacayis” yaagees Goday.

11Bessonna ogen shalo shiishiya asi babaa gidonna phuuphulle qoxiya kuraacho mela. Ba laytha bagga zawan aggidi baana; wursethan iya eeyatethay qoncana.

12Nu Xoossa keethay koyrope doomidi, boncho kawotetha araatada dhoqa deriya bolla de7ees.

13Abeeti Godaw, Isra7eele ufaysaw, nena aggida ubbay yeellatana. De7o pulto haatha, nena Godaa enti aggida gisho baanan xaafetida sunthada dhayana.

14Abeeti Godaw, ne ta galataa gidiya gisho, tana patha; ta paxana; tana ashsha; ta attana.

15Asay taako, “ ‘Goday taw odis’ yaagada ne odida qaalay awun de7ii? I ayis poletennee?” yaagosona.

16Taani henthancho gidada nena haggaazo aggabike; enti metootana gallasaa ta amottabike. Ta doonape keyida qaala ne eraasa.

17Tana daganthofa; meto gallas taani baqatada attiya bessay nena.

18Tana yedetheysati yeellato; shin tana yeellayopa. Enta dagantha; shin tana daganthofa. Enta bolla meto eha; enta nam7u kushe seera.

19Goday taako, “Koyro bada Yihuda kawoti katamaa geliyanne keyiya, asay geliya pengiyaninne hara Yerusalaame pengeta ubban eqa.

20Asaako haysada yaaga: ‘Hinteno Yihuda kawoto, hinteno Yihuda asaw, hinteno Yerusalaame asaw, ha pengetara geliya asaw, ubbay Godaa qaala si7ite.

21Sambaata gallas tooho tookidi Yerusalaame pengiyara gelonna mela naagetite.

22Sambaata gallas hinte keethaafe tooho tookidi kessofite, woyko aybi oosoka oothopite. Kase hinte aawata ta kiittidaysada Sambaata gallas bonchite.

23Gidoshin, enti si7ibookona; banta haythaa taako zaaribookona. Enti tana si7onnanne taape tamaaronna ixidosona.

24Shin hinte taw kiitetiko, Sambaata gallasan tooho tookidi, ha katamaa pengetara gelonna aggiko, Sambaata gallas aykoka oothonna dummayidi bonchiko,

25Dawita araatan uttiya kawoti banta moorinnatara paratanne para gaareta toggidi, ha pengetara gelana. Enti Yihuda asaaranne Yerusalaame kataman de7iya asaara gelana; ha katamay merinaw asi de7iya katama gidana.

26Asay xuussa yarsho, hara yarsho, katha yarsho, ixaanenne galata yarsho ekidi, Yihuda katamatape, Yerusalaame yuushuwan de7iya gutatape, Biniyaame biittafe, gadhape, derey dariya biittafenne, Negebape Godaa Xoossa keethaa yaana.

27Shin hinte Sambaata gallasa dummayidi bonchona aggidi, Sambaata gallasan tooho tookidi, Yerusalaame pengetara gelidi, ta higgiya menthiko, ta he pengetan tama oythana. Yerusalaame kawo keethata maana; he tamay to7enna’ ” yaagees Goday.

← Chapter 16 Chapter 18 →