Isaiah 59

Amharic Gofa GFBLVF (Geeshsha Maxaafa)

1Heko, Godaa kushey hintena ashshanaw qaammibeenna; iya haythay si7anaw tullibeenna.

2Shin hinte nagaray hintefenne hinte Xoossaafe giddon shaahetethi medhis. I si7onna mela hinte nagaray iya som7uwa hintefe genthis.

3Hinte kushey suuthan, hinte biradhey naaqon tunis; hinte doonay wordo odetees; hinte inxarsay iitaba zuuzumees.

4Xillotethan mootey baawa; suuretethan pirdeyka baawa. Enti coo palaman ceeqetoosona; wordo odetoosona; cimo qanthatidi iitatethi yeloosona.

5Enti shoosha phuuphulle haphoosona; shango haada daddoosona. He phuuphulleta miya asi hayqees; phuuphulliyafe issoy meqiko, iyape shooshi keyees.

6Enti daddida shango haaday ma7os hanenna; iyara banta asatethaa kammanaw danda7okona. Enta oosoy iita; geella oosoy enta kushen kumis.

7Enta tohoti iitabaa oothanaw woxoosona; xillo suuthi gussanaw eesotoosona. Enta qofay iita; enti bida bessa ubban qohoynne boshi de7ees.

8Enti sarotetha oge erokona; enta ogiyan suure pirdi baawa. Enti banta ogiya geellayidosona; he ogiyara hemetiya oonika saro demmenna.

9Hessa gisho, suure pirdi nuupe haakis; xillotethi nuuko shiiqenna. Nuuni poo7o koyoos, shin dhuma gidis; wagagga poo7o koyoos, shin sakana dhuman hemetoos.

10Nuuni qooqeda dirsaa gimbiya bolla tattafoos; seeta gallas, sa7i lem7in hemetiyada dhubetoos; wolqara de7iya asaa giddon nuuni hayqida asa mela gidida.

11Nuuni ubbay babanthada waassos; holleda kayotidi oolos. Nuuni suure pirda koyida, shin demmibooko; atotethi koyida, shin I nuupe haakis.

12Nu balay ne sinthan daris; nu nagaray nu bolla markatees. Nu naaqoy nuura de7ees; nu qohuwa nu eroos.

13Nuuni makallidi, Godaa kadhida; nu Xoossaa aggidi guye simmida. Geellatethinne gene odetida; nuuni wordo qanthatidi wordo yelida.

14Suure pirdi guye sugetis; xillotethi nuupe haakis. Tumatethi dabaaban dhubetees; ammanetethi gelanaw besse dhayis.

15Tumatethi awunka bentenna; iitatethafe haakiya asi qohos aadhidi imetees; Goday suure pirdi baynaysa be7idi azzanis.

16Un7eteyisata maaddiya asinne entaw gaannatiya asi baynaysa Goday be7idi malaaletis. Hessa gisho, iya qesey iyaw atotethi ehis; iya xillotethay iya katisidi oykis.

17I, xillotethi tiran wothiya ola miisheda ma7is; ba huuphiyan atotetha barneexa wothis; halo kessi ma7oda, hanqo afilada ma7is.

18I entaw enta oosuwada oosuwada zaarana; hanquwa ba morketas, seera baara eqeteysatas ciggana; yuushoy abban teqetida biittatas enta oosuwada immana.

19Godaa peenoy wolqaama goteda di77ishe yaana gisho, wuloha baggan de7eysati Godaa sunthaas yayyana; doloha baggan de7eysati iya bonchana.

20“Xiyoonesinne Yayqooba zeretha giddon banta nagarape simmeyisata Wozeysi yaana.

21Taw entara de7iya caaqoy haysa: hinte bolla de7iya ta Ayyaanaynne taani hinte doonan wothida ta qaalay, hachife doomidi, merinaa gakanaw, hinte doonape, hinte nayta doonapenne hinte nayta nayta doonape shaaketenna” yaagees Goday.

← Chapter 58 Chapter 60 →