Isaiah 56

Amharic Gofa GFBLVF (Geeshsha Maxaafa)

1“Suure pirdaa naagite; xillo oothite; ta atotethay ellesidi yaana; ta xillotethay matan qoncana.

2Haysa oothiya uray, Sambaata tunisonna bonchiya uraynne ba kushey iitabaa oothonna mela teqiya uray anjetidaysa” yaagees Goday.

3Godaako shiiqida bete asi, “Goday tana ba asaape shaakana” goopo; shuufay, “Taani melida mithi” goopo.

4“Ta Sambaata bonchiya, tana ufaysiyaba dooreynne ta caaquwa minthidi naagiya shuufatas,

5entaw taani ta keethaninne ta dirsa gimbiya giddon enti hassayetiyaba immana. Enti macca na7anne adde na7a yelidi, demmiya bonchuwafe aadhiya sunthi taani entaw immana; taani merinaw dhayonna sunthi entaw immana.

6Godaa haggaazanaw, Godaa dosanawunne iya aylle gidanaw bantana iyako shiishiya, sambaata tunisonna bonchiyanne ta caaqo qaala minthidi naagiya bete asata,

7taani ta geeshsha zumaa bolla ehada ta woosa keethan enta ufaysana. Enti ta yarsho bessan shiishiya xuussa yarshoynne hara yarshoy eketana; ta keethay asa ubbay Xoossaa woossiya keethi geetetana” yaagees.

8“Shiqidaysata bolla gujada harataka taani shiishana” yaagees Isra7eelepe laaletidaysata shiishiya, Ubbaa Haariya Goday.

9Hinteno bazzo do7ato, hinteno wora do7ato, ubbay haa yidi miite.

10Isra7eele asaa naageysati qooqe; entaw eri baawa; enti ubbay boccanaw danda7onna butale kanata; enti zin7idi elmotoosona; dhisko dosoosona.

11Enti midi kallonna yaramba kana mela; enti akeeki pacida henthancho. Enti ubbay banta oge bidosona; ubbay banta go77a xalaala koyoosona.

12Enti, “Haa yiite; woyne ushsha ane uyoos; mathoyiya ushsha ane ganoos! Wontoy hachi mela gidana; hachifeka aadhidi lo77ana” yaagosona.

← Chapter 55 Chapter 57 →