Isaiah 38

Amharic Gofa GFBLVF (Geeshsha Maxaafa)

1He wode kawoy Hizqiyaasi hargidi, hayqanaw matis. Amoxe na7ay nabey Isayaasi iyako bidi, Goday, “Ne hayqana haniya gisho ne keetha giigisa” yaagis.

2Hizqiyaasi godaako simmi zin7idi, Godaa woossis.

3“Abeeti Godaw, taani ne sinthan tumatethaninne kumetha wozanan hemetidaysanne nena ufaysiyabaa oothidaysa hassaya” yaagidi cametidi yeekis.

4Hessafe guye, Godaa qaalay Isayaasako,

5Bada Hizqiyaasako, Goday ne mayza Dawita Xoossay, “Taani ne woosa si7as; ne afuthaa be7as. Ne laytha bolla taani tammanne ichashu laytha gujana.

6Nenanne ha katamaa Asoore kawa kushepe ashshana; taani ha katamaas oletana” yaaga.

7“Goday ba gida qaala polanaw immida mallay haysa yaagis:

8Akaazi keyanaw giigisida dethan de7iya kuyay tammu tango guye simmidi baana mela taani oothana” yaagis. Kuyay tammu tango guye simmidi bis.

9Yihuda kawoy Hizqiyaasi hargiyafe paxidi xaafida mazmurey haysa:

10Taani, “Ta de7o laythay bagga gakonna de7ishin, hayqo pengera gelana haniyana? Attida laytha bonqetana haniyana?” yaagas.

11“Taani de7on de7eyisata biittan Godaa be7ike; ha sa7an ase be7ike; ha alamiyan de7eysatara zaarada de7ike.

12Dorse heemmeyisata dunkaaniyada, ta de7oy shodetis. Dorzey afila wandaraashen xaaxeysada, ta de7oy xaaxetis. Dorzey afila duuthiyada, ta de7uwa duuthis. Wontafe omarsi gakanaw tana dhaysaasa” yaagas.

13“Qamma kumetha danda7an naagas; gaammoda ta meqetha ubbaa menthadasa; wontafe omarsi gakanaw tana dhaysadasa.

14Taani kaarodanne cilashoda waassas; holleda zuuzumas. Ta ayfey salo xeellishe daaburis; Godaw, taani un7etas; neeni tana ha un7aafe kessa” yaagas.

15Haysa ubbaa oothiday Godaa; taani ay gaanaw danda7iyana? Ta shempoy un7etida gisho, ta laytha ubbaa ashketethan daana.

16Godaw, haysa mela seeran asay de7on de7ees. Ha77i ta payyatetha zaarada, tana de7on wotha!

17Ta un7etethay taw lo77o gidis; neeni ta shempuwa dhayo ollafe ashshadasa; ta nagara ubbaa neeni guye yeggadasa.

18Duufoy nena galatenna; hayqoy nena sabbenna. Ollan wodhidaysati, ne ammanetetha ufaysi oothokona.

19Taani hachi nena galateysada, de7on de7eysati nena galatoosona. Ne ammanetetha aawati banta naytas odoosona.

20Goday tana ashshana; hessa gisho, nuuni nu de7o laytha ubban, Godaa keethan diithan yexana.

21Isayaasi kase, “Balase daaxidi, iya kixa bolla wothite; I paxana” yaagis.

22Hizqiyaasi kase, “Taani paxada Godaa keethi baanaysas mallay aybe” yaagidi Isayaasa oychis.

← Chapter 37 Chapter 39 →