Isaiah 31

Amharic Gofa GFBLVF (Geeshsha Maxaafa)

1Maado demmanaw Gibxe wodheysatanne paran ammaneteyisata ayye! Para gaareta darotethaaninne para asata minotethan ammaneteyisata ayye! Enti Isra7eele Geeshshaa xeellokona woyko Godaape maado koyokona.

2Shin Goday cinca gidiya gisho gado yeddana; I odidaysa aggenna. Iita asaa bollanne iitabaa oothiya asaa maaddeyisata bolla dendana.

3Gibxeti asepe attishin, xoosse gidokona; enta paratika ashope attishin, ayyaana gidokona. Goday hanqon ba qesiya denthiya wode maaddeysi dhubetana; maadeteysi kundana; enti ubbay issife dhayana.

4Goday taako haysada yaagis: “Gaammoy woyko wodala gaammoy mehe oykidi daariya wode henthanchoti xeegetidi shiiqikoka, I enta waasuwas dagammenna; enta qaalas yayyenna. Hessadaka, Ubbaafe Wolqaama Goday Xiyoone zumanne iya zumata olanaw wodhana.

5Kafoy aaleysada Ubbaafe Wolqaama Goday Yerusalaame gechana, ashshana, naagana; iya bollara aalidi heemmana.

6“Hinteno Isra7eele asaw, hinte makallidi ixida, iyako simmite.

7He gallas nagari kumida hinte kushiyan birapenne worqafe oothida eeqata wora holana.

8Asoorey asaba gidonna mashshan kundana; asaba gidonna mashshi enta maana. Enti mashsha sinthafe baqatana; enta na7atethati wolqan asas oothana.

9Dagama gaason enta mino miixay laaletana; enta toora moconati dagammidi yeggi dhayana” yaagees, iya tamay Xiyoonen, iya coocey Yerusalaamen de7iya Goday.

← Chapter 30 Chapter 32 →