Isaiah 27

Amharic Gofa GFBLVF (Geeshsha Maxaafa)

1He gallas Goday ba mino, gitanne wolqaama mashshan Leewataane geetetiya xongetiyanne xaaxetiya shoosha seerana; abban de7iya do7aaka wodhana.

2He gallas haysada geetetana: “Lo77o woyne gadiyas yexite;

3Taani, Goday iya naagayis; taani qanxonna haathe ushshayis; oonika iya qohonnaada qamma gallas naagayis.

4Taani hanqetike; taara oletanaw agunthinne gom7orey ane dendo! Taani enta bolla keyada enta xuugga wursanashin.

5Woyko qosetidi attanaw taako yo; taara sigeto; ee, taara sigeto” yaagetana.

6Yaana wodiyan Yayqoobi xapho yeddana; Isra7eeley aacananne ciiyana; iya ayfey biitta ubbaa kumana.

7Enta shocidaysata shocidaysada Goday Isra7eele asaa shocideyee? Woyko enta wodhidaysata wodhidaysada enti hayqidonaayee?

8Goday ba asaa di7etana mela oothidi seeris; wolqaama doloha bagga gotiyan enta gooddidi kessis.

9Yayqooba naaqoy atto geetetanaynne iya nagaray polo qushetanay, yarsho shucha ubbaa I mentherethidi booqinte shuchada oothiya wodenne Asheera eeqa misiliya woyko ixaane cuyisiya bessaa laaliya wode.

10Diretida katamay baysatis; kase asi de7iya bessay ha77i bazzo mela dogetidi attis. Mehey heemetiya bessi gidida gisho, maatanne mitha haythaa midi marati yan allatoosona.

11Mitha tasheti meliya wode meqeretoosona; maccasay mixidi eethanaw efoosona. Ha asay akeeki bayna asi gidiya gisho, enta medhidaysi entaw qadhetenna; enta maarenna.

12He gallas Efraxiisa shaafape Gibxe shaafa gakanaw Goday kathaa qoxana. Hinte, Isra7eele asay issoy issoy shiiqana.

13He gallas gita moyzey punetana; Asoore biittan dhaydaysatinne Gibxe biitta di7etidaysati yidi, Yerusalaamen geeshsha zumaa bolla Godaa goyinnana.

← Chapter 26 Chapter 28 →