Hosea 5

Amharic Gofa GFBLVF (Geeshsha Maxaafa)

1“Hinteno kahineto, haysa si7ite! Hinteno Isra7eele asato, akeekite! Kawo keetha asato, loythi si7ite! Ha pirday hinte bolla pirdetis. Hinte Mixiphas xihe gidideta; Taabore zuma bolla miccetida giteda gidideta.

2Geellati wodho aggibokona; hessa gisho, ta enta ubbaa seerana.

3Taani Efreema erayis; Isra7eeley taape geemmibeenna. Efreema, neeni ha77i layma gidadasa; Isra7eeley tunis.”

4“Isra7eele asay banta Xoossaako simmonna mela enta iita oosoy enta teqis. Laymatetha ayyaani enta wozanan de7iya gisho enti Godaa erokona.

5Isra7eele asaa otoroy enta bolla markatees. Isra7eele asaynne Efreema asay banta nagara gaason dhubetoosona; Yihuda asayka entara dhubetees.

6Enti Godaas yarshanaw banta dorsa wudiyanne mehe wudiya laagi ekidi iya koyanaw baana; shin I entafe shaaketida gisho iya demmokona.

7Enti laymatethan nayta yelida gisho Godaas ammanetibokona. Hessa gisho, issi ageenan entinne enta biittay dhayana.

8Gib7a kataman moyze, Rama kataman zaye punnite. Biniyaame asaw, ‘Guye simmidi be7ite’ yaagidi Beet-Aweenan waassite.

9Seeretiya wode Efreemi baysa gidana. Isra7eele kochaa giddon tuma hananaba taani awaajana.

10“Goday, ‘Yihuda halaqati zawa sugiya asa mela gididosona; taani ta hanquwa enta bolla di7o haathada gussana.

11Efreema asay eridi eeqa goyinnida gisho, suure pirdan un7etidosona; tinchetidosona.

12Hessa gisho, taani Efreema asaas bile, Yihuda asaas xoodha gidana.

13“ ‘Efreemi ba hargiya, Yihudi ba madunthaa be7ida wode Efreemi Asoore biitta bis; he gita kawa maado oychis. Shin I enta hargiya dhallanaw woyko enta madunthaa pathanaw danda7ibeenna.

14Hessa gisho, taani Efreemas gaammoda hanana; Yihudas wodala gaammoda hanana. Taani enta mentherethada eka baana; oonika enta ta kushepe ashshena.

15Enti banta bala akeekana gakanawunne tana koyana gakanaw taani guye ta bessaa simmana. Enti banta waayan tana minthidi koyana’ ” yaagees.

← Chapter 4 Chapter 6 →