Genesis 48

Amharic Gofa GFBLVF (Geeshsha Maxaafa)

1Hessafe guye asay, “Ne aaway saketees” yaagidi Yoosefas odidosona. I ba nam7u adde nayta Minaasenne Efreema ekidi ba aawa be7anaw bis.

2Yayqoobi, iya na7ay Yoosefi yidaysa si7ida wode, Isra7eeley bana minthethidi hiixan uttis.

3Yayqoobi Yoosefa, “Ubbaa Danda7iya Xoossay Kanaane biittan Looza kataman taw qoncidi, tana anjis.

4I tana, ‘Taani ne yeletetha darsana, nena daro dere oothana. Ha biitta taani neepe guye, ne sheeshas merina laata oothada immana’ ” yaagis.

5“Hiza, ne nam7u adde nayti, taani neeko haa yaanape sinthe Gibxen new yeletidaysati tabaa. Efreemeynne Minaasey taw Robeela melanne Simoona mela.

6Entafe guye yeletanaysati nebaa gido. Enti laattana biittay Efreema sunthaninne Minaase sunthan gido.

7Taani Masephexoomepe simmishin, Efraata gakanaw guuthi attishin, Raheela Kanaane biittan hayqasu. Taani iyo Beeteleme geetetiya Efraata efiya ogiya gaxan moogas” yaagis.

8Isra7eeley Yoosefa adde nayta nam7ata be7ida wode, “Haysati oonantee?” yaagidi oychis.

9Yoosefi ba aawako, “Haysati Xoossay taw ha biittan immida nayta” yaagis. Yaatin Isra7eeley, “Taani enta anjana mela, enta taako haa shiisha” yaagis.

10Isra7eeley cimin iya ayfey ixida gisho, xeellanaw danda7enna. Hessa gisho, Yoosefi ba adde nayta iyako shiishin, Yayqoobi enta idimmidi yeeris.

11Isra7eeley Yoosefa, “Taani ne ayfiya be7ana gada qopabike, shin Xoossay heko ne naytaka tana bessis” yaagis.

12Yoosefi ba nayta Yayqooba gulbatape denthidi, ba som7uwa sa7a gathidi ziggis.

13Yoosefi ba nam7u adde nayta, Efreema Isra7eeles haddirsa baggara, Minaase Isra7eeles ushacha baggara essis.

14Isra7eeley ba kushiya barbaxidi Efreemi kaalo gidikoka, ba ushacha kushiya huuphen wothis. Minaasey bayra gidikoka, Isra7eeley ba haddirsa kushiya Minaase huuphen wothis.

15Hessafe guye, Yayqoobi Yoosefa haysada yaagidi anjis; “Ta aawati Abrahaameynne Yisaaqi, iya sinthan de7ida Xoossay, ta de7o ubban hachi gakanaw tana heemmida Xoossay nena anjo.

16Iitaba ubbaafe tana ashshida, iya kiitanchoy, ha nayta naago. Ta sunthaynne, ta aawata Abrahaame Yisaaqa sunthay entan xeegeto. Enti sa7a bolla daro” yaagidi anjis.

17Yoosefi ba aaway ba ushacha kushiya Efreema huuphen wothidaysa be7ida wode dosibeenna. Hessa gisho, Efreema huuphiyape denthidi, Minaase huuphen wothanaw ba aawa kushiya oykis.

18Yoosefi, “Ta aawaw, hessa gidenna. Bayray haysa ne ushacha kushiya iya bolla wotha” yaagis.

19Shin iya aaway ixidi, “Ta erayis, ta na7aw, ta erayis. Minaaseyka gita dere gidana, shin iya kaalo ishay iyape aadhidi gitatana. Iya sheeshayka daro gita kawotetha gidana” yaagis.

20I he gallas enta anjishe, “Isra7eeleti anjo anjiya wode, ‘Xoossay hintena Efreemadanne Minaaseda ootho’ yaagidi hinte sunthan anjana” yaagis. Yaatidi Efreema Minaasepe sinthayis.

21Hessafe guye, Isra7eeley Yoosefa, “Taani hayqanaw matas, shin Xoossay hintera de7ees. I hinte aawata biitta hintena guye zaarana.

22Taani Amooretape ta mashshaninne ta dongen ekida biitta, ne ishatara ne shaaketada ekiya biitta bolla new gujada immas” yaagis.

← Chapter 47 Chapter 49 →