Genesis 40

Amharic Gofa GFBLVF (Geeshsha Maxaafa)

1Guutha wodepe guye, Gibxe kawa ushsha kaapoynne katha kaapoy banta godaa, Gibxe kawa naaqidosona.

2Kawoy he nam7u kaapota bolla daro yilotidi,

3Yoosefi qashetida, qasho keetha naageysata kaapuwa son enta qachis.

4Naageyseta halaqay enta Yoosefas sheedhis, ika entaw kiitetees. Enti qasho keethan daro wode uttidosona.

5Gibxe kawa ushsha kaapoynne katha kaapoy, qasho keethan de7ishe nam7ayka issi qamma dumma dumma amuho amuhidosona. He amuhotas dumma dumma birshethay de7ees.

6Yoosefi wonta entako geliya wode enti azzanidi uttidashin be7is.

7I entana, “Hachi hinte som7oy ayis dhumidee?” yaagidi oychis.

8Enti, “Nu nam7ayka amuho amuhida, shin nuus birshiya asi dhayis” yaagidosona. Yoosefi entako, “Amuho birshiya eratethay Xoossaba gidenneyee? Ane hinte amuhuwa taw odite” yaagis.

9Yaatin ushsha kaapoy ba amuhuwa Yoosefas odis; “Taani ta amuhon issi woyne ta sinthan be7as.

10He woyniyas heedzu tasheti de7oosona. I hayxidi, ciiyi simmidi teeris.

11Kawo wanci ta kushen de7ees. Taani woyne teera ekada iyan gum7ada, he wanca kawa kushen wothas” yaagis.

12Yoosefi, “Ha amuhuwa birshethay haysa; heedzu tasheti heedzu gallasata.

13Heedzu gallasata giddon Kawoy nena qashope billana. I nena kase shuumatethaako zaarana. Kase neeni ushsha kaapo gidada ootheysada neeni kawa wanca iya kushiyan wothana.

14Shin new sa7i lo77ida wode tana dogopa; taw keeha. Tabaa kawas odada, ha qasho keethafe tana kesisa.

15Tana Ibraawe biittafe wolqan ehidosona. Hari attoshin, haysan tana qashos gathiyaba aybibaaka oothabike” yaagis.

16Kathaa kaapoy Yoosefi amuhuwa loythidi birshidaysa be7ida wode Yoosefako, “Taani amuhida amuhoy haysa; ta huuphen heedzu gabate uythi de7ees;

17bolla bagga gabatiyan Gibxe kawas dumma dumma katha qommofe uuketida uythay de7ees. Shin kafoti he ta huuphen de7iya gabatiyape moosona” yaagis.

18Yoosefi, “He amuhuwa birshethay haysa; heedzu gabateti heedzu gallasata.

19Heedzu gallasa giddon Kawoy nena qashope billana. Ne qoodhiya qanxisidi mithan kaqisana; ne ashuwaka kafoy maana” yaagis.

20Heedzantho gallasan Gibxe Kawoy ba yeletida gallasan ba moorinnata ubbaas gibira giigisis. Ushsha kaapuwanne katha kaapuwa billi ehidi ba asa sinthan essis.

21Ushsha kaapuwa iya shuumatethaako zaarin, I kawa kushiyan wanca wothis.

22Shin Kawoy kathaa kaapuwa kaqisis. Ubbayka Yoosefi enta amuhuwa birshidaysada hanis.

23Shin ushsha kaapoy Yoosefa hassayonna dogi aggis.

← Chapter 39 Chapter 41 →