Ecclesiastes 7

Amharic Gofa GFBLVF (Geeshsha Maxaafa)

1Al77o shittofe lo77o sunthi aadhees; yeletiya gallasape hayqo gallas lo77o.

2Asa ubbaa wursethay hayqo gidida gisho, gibira keethi beysafe yeeho keethi beysi lo77o; de7on de7iya asi hessa ba wozanan wothanaw koshshees.

3Azzanoy som7o kareethikoka, wozana poo7isiya gisho miichafe azzanoy lo77o.

4Cinca asa wozani yeeho son de7ees; shin eeya asa wozani ufaysa son de7ees.

5Eeyata yethi si7anaape cincata seera sissi lo77o.

6Eeya asa miichi agunthan tama yeddin dhuuqeysa mela; hessika hada.

7Gene oosoy cinca asi eeya kessees; wodhaafe ekoy wozana iissees.

8Doomethafe wursethi lo77o; otorope danda7i lo77o.

9Eeyata hanqoy enta ki7on de7iya gisho, neeni ne shempuwan hanqos ellesopa.

10“Ha77i wodiyape kase wodey ayis lo77o gididee?” gada oychofa; hessa mela oyshoy cinca asi oychiya oysho gidenna.

11Ha sa7an de7iya asi ubbay cinca gidanaw koshshees; cincatethi demoy laatape lo77o.

12Miishey ase iitape kammidi ashsheysada cincatethika ashshees. Shin cincatethi miishepe aadhey asa de7o naaganaw danda7iya gishosa.

13Ane Xoossi oothidaba akeeka! Xoossi geellayidaba ooni suurisanaw danda7ii?

14Sa7i giigida wode ufayta; metoy gakiya wode akeeka. Ufaysi gidin meto gidin Xoossi yeddiya woden yees. Shin awusi koyrottidi yaaneko neeni eraka.

15Ha hada gidida ta laythan darobaa be7as. Hessika, geellay ba geellatethan adussa laythi de7iya wode xilloy qantha laythan hayqees.

16Hessa gisho, neeni elle dhayonnaada daro xillo woyko daro cinca gidopa.

17Neeni wodey gakonna hayqonnaada aadhida iita gidopa; aadhada eeya gidopa.

18Ha ubban Xoosse yayya; asi meto ubbaa xoonon keyanaw danda7iya gisho neeni daro iita woyko daro xillo gidonashin giddo asi gida.

19Cincatethi cincaas immiya wolqay issi katama haariya tammu asata wolqafe aadhees.

20Xillobaa xalaala oothidi nagara oothonna de7iya asi ha sa7aa bolla baawa.

21Asi haasaya qaala ubbaa si7ada polana goopa; neeni ubbaa si7ana giiko ne aylley nena baaddishin si7ana.

22Qassi neeni ne huuphen harata baaddiyaba ne wozanay erees.

23Hessa ubbaa taani cincatethan pilgada be7as. Yaatada, “Taani cinca gidana” yaagas. Shin taani gidaysada hanibeenna.

24Cincatethi ubba wode haahon de7iyabaanne ciimmoba; yaatin, iya koyidi demmanaw danda7ey oonee?

25Taani pilgada xeellanaw cincatethinne oda ubbaa wursethaa eranaw qopas. Nagari eeyatethi, eeyatethi gooshshatethi gideysa eranaw gakas.

26Taani hayqope aadhidi cammiya haraba demmas. Hessika, I wozanay gite, I kushey santhalaata gididi xiheda oykiya issi maccas be7as. Xoosse yayiya asi iipe kessi ekana; shin nagaranchuwa iya ba xihiyan xaaxada oykana.

27Astamaarey haysada yaagis; “Taani pilgada demmidabay haysa.

28Hessika, taani hachi gakanaw koyada demmaboonnaba. Mukulu adde asa giddofe bonchoy bessiya issi adde xalaala demmas; shin macca asaa giddofe issinnoka demmanaw danda7abike.

29Taani pilgada demmida harabay, Xoossi ase suure qofara medhis; shin asi daro gene oge koyidi bis” yaagis.

← Chapter 6 Chapter 8 →