2 Samuel 24

Amharic Gofa GFBLVF (Geeshsha Maxaafa)

1Godaa hanqoy qassika Isra7eele bolla eexis; Goday Dawita enta bolla denthethidi, “Bada Isra7eelenne Yihuda asaa tayba” yaagis.

2Hessa gisho, kawoy tora moconata Iyo7aabanne baara de7eysatako haysada yaagis; “Isra7eele kochata Daanepe Barsaabe gakanaw taani erana mela Isra7eele asaa bidi taybite” yaagis.

3Shin Iyo7aabi, “Goday ne Xoossay ha de7iya asaa bolla xeetu kushe gujo! Hessa ta godaa, kawa ayfey be7o! Shin ta goday, kawoy ayis hessa melaba oothanaw koyii?” yaagis.

4Shin kawa qaalay Iyo7aabanne tora moconata xoonin, enti kawa sinthafe keyidi, Isra7eele asaa taybanaw bidosona.

5Enti Yordaanose pinnidi dugeha baggan de7iya, zangaara giddon de7iya Aro7eera kataman dunkaanidosona; yaape Gaade kanthidi Iyazeera gakidosona.

6Yaape enti Galadanne Hiteta biittan de7iya Qaadesa bidosona; yaape qassi Daane bidosona; yaara Sidoona gakidosona.

7Yaape dendidi, Xiroosa miixanne Hiwetanne Kanaaneta katamaa ubbaa bidosona. Wursethan Yihuda Negeban de7iya Barsaabe bidosona.

8Enti biitta ubbaa yuuyishe uddufun ageenanne laatamu gallas gam7idi, Yerusalaame simmidosona.

9Iyo7aabi asaa taybuwa kawa erisis; Isra7eelen mashshan oletanaw danda7iya hospun xeetu mukulu mino olanchoti, Yihudan qassi ichashu xeetu mukulu olanchoti de7oosona.

10Asaa taybidaape guye, Dawita wozanay hirgin, Dawiti, “Taani ha oosuwan gita nagara oothas. Shin ha77i abeeti Godaw, taani nena woossayis; ta nagaraa, ne aylliya nagaraa atto ga. Taani daro boozaba hanas” yaagis.

11Wontetha gallas Dawiti hiixape dendiya wode Dawitas qoncethi be7iya, nabiya Gaadeko Godaa qaalay yis.

12“Bada, Dawitako, ‘Taani nena heedzubaape issuwa doorana mela bessayis; taani ne bolla polanaw entafe issuwa doora’ yaagees Goday” yaagis.

13Gaadi Dawitako bidi, “Heedzu laythi ne biitta bolla kosha ehoyee? Woyko ne morketi nena yedethin, heedzu ageena enta sinthafe baqataneyee? Woyko ne biitta bolla heedzu gallas gadoy yaanaysa dooray? Ane ha77i qopada taani tana kiittidaysas zaaranaba oda” yaagis.

14Dawiti Gaadeko, “Taani daro un7etas. Godaa maarotay gita gidiya gisho, nuuni iya kushen kundana; tana asa kushen yeggofo” yaagis.

15Hessa gisho, wontafe bidi I gida gallasay gakanaw Goday Isra7eele biittan gado kiittis. Isra7eele biittan Daanepe bidi Barsaabe gakanaw laapun tammu mukulu asi hayqis.

16Yerusalaame dhaysanaw kiitanchoy ba kushiya miccida wode asaa bolla gakida gadoy Godaa azzanthida gisho, asaa shociya kiitanchuwako, “Gidana! Ne kushiya zara” yaagis. Godaa kiitanchoy he wode Yaabuse addiya Orna wudumman de7ees.

17Asaa shociya kiitanchuwa Dawiti be7ida wode Godaako, “Nagaraa oothiday tana; ta balas! Ha dorsati ay oothidona? Hayyana, tananne ta aawa soo asaa ne seerana mela taani woossayis” yaagis.

18He gallas Gaadi Dawitako yidi, “Bada, Yaabuse addiya Orna wudumman Godaas yarsho bessi giigisa” yaagis.

19Dawiti, Goday Gaade baggara kiittidaysada oothanaw pude bis.

20Orni duge xeelliya wode, kawoynne iya asati baako yeysa be7is. I gaxa keyidi, gufannidi kawas ziggis.

21Orni, “Ta goday kawoy ba aylliyako, ayis yidee?” yaagis. Dawiti, “Asaa bollafe gadoy simmana mela taani Godaas yarsho bessi giigisanaw ne wudumma shammanaw yas” yaagis.

22Orni, “Ta goday, kawoy ba koydaba ekidi yarsho! Xuussa yarshos boorati de7oosona; eeso mithas qassi kathi bukiya miisheynne boora qambari de7ees.

23Kawaw, haysa ubbaa Orni kawas immis” yaagis. Gujidi Orni, “Goday ne Xoossay ne yarshuwa eko” yaagis.

24Shin kawoy, “Akay, taani ta miishen shammana. Ta Godaa, Xoossaas xuussa yarsho gatey bayna yarshike” yaagis. Hessa gisho, kawoy wudummaanne boorata Ornafe ishatamu bira santimen shammis.

25Dawiti he bessan yarsho bessi giigisidi xuussa yarshonne issifetetha yarsho Godaas yarshis. Goday biitta gisho woosetida woosa si7idi, gaduwa Isra7eelepe diggis.