2 Kings 25

Amharic Gofa GFBLVF (Geeshsha Maxaafa)

1Sedeqiyaasi kawotida uddufuntho laythi, tammantho ageenan, tammantho gallas, Babiloone kawoy Nabukadanaxoori ba olanchota ubbaa ekidi, Yerusalaame teqis; iya yuushuwan biitta dooridi teqis.

2Sedeqiyaasi kawotida tammanne issintho laythi gakanaw, katamay teqetidi gam7is.

3Hessa gaason biittan koshi suullin, he laythi oyddantho ageenan, uddufuntho gallasan asas miyabay dhayis.

4Katamaa yuusho gimbey issi baggara meqin, Kaldaaweti yuuyi aadhidi naagikoka, Yihuda kawa olanchoti kumethi qamma kawo gade efiya ogiya oykidi, nam7u dirsa gimbeti gahetiya pengiyara keyidi baqatidosona. Enti Yordaanose dilbaako simmidi baqatidosona.

5Shin Babiloone olanchoti kawa yedethidi, Iyaarko demba gathishe oykidosona. Iya olanchoti ubbay iyape shaaketidi laaletidosona.

6Hessafe guye, enti iya Rabila kataman de7iya Nabukadanaxoorako efidosona. Babiloone kawoy Sedeqiyaasa bolla pirdis.

7Sedeqiyaasa nayta, Sedeqiyaasi xeellishin wodhidosona. Iya ayfeta wooci kessidi, santhalaatan qachidi, Babiloone biitta efidosona.

8Nabukadanaxoori Babiloonen kawotida tammanne uddufuntho laythan, ichashantho ageenan, laapuntho gallasan, kawa moorinatape issoy, kawa naageysata halaqay Nabuzardaani Yerusalaame gelis.

9Xoossa keethaa, kawo gadhonne Yerusalaamen de7iya keetha ubbaa, gita keethi geetetiya ubbaa xuuggis.

10Babiloone olanchoti ubbay kawa naageysata halaqaa kiitan Yerusalaame katama yuushuwan de7iya dirsa gimbiya ubbaa laallidosona.

11Nabuzardaani katamaninne Yihudan attida asata, kaddidi Babiloone olanchotan gahetida asata ubbaa oykidi, di77idi efis.

12Shin Nabuzardaani wursetha manqotape guuthata woyne tokanaadanne gade goyanaada Yihudan ashshis.

13Babiloone asati Xoossa keethan de7iya naase biratape medhida tuussata, caana gaaretanne gita kereta mentherethidosona; naase birata ubbaa Babiloone efidosona.

14Kereta, akaafata, xompe xeera pittiyabata, cilpatanne yarsho wode go7etiya naase birata miisheta ubbaa efidosona.

15Kawa naageysata halaqay Nabuzardaani worqafe oosetida miisheta worqatho, birape oosetida miisheta biratho oothi ekidi, ixaane cuyisiya shaatetanne xaarota ubbaa efis.

16Kawoy Solomoney Xoossa keetha oosos giigisida nam7u tuussata, gita keretanne caana gaareta, naase birata mizaanen likanaw danda7etibeenna.

17Nam7u tuussati issi mela gididi, issuwa issuwa geesay tammanne hospun wadha; qassi issi issi tuussa huuphen de7iya gumboti heedzu wadha adusse. He gumbota yuushoy naase birata giteninne oromaane teera misilen alleeqetis.

18Kawa naageysata halaqay Nabuzardaani, kahine halaqaa Saraya, iya kaalliya kahiniya Sofoniyaasanne penge naagiya hara heedzu asata oykis.

19He wodey gakanaw, kataman de7iya asape Yihuda toora mocona, kawa zoreysatape ichashu asata, toora moconata xaafiya, olanchota dooriya hara usupun tammu asata efis.

20Halaqay Nabuzardaani enta ubbaa, Babiloone kawako Rabila katama efis.

21Babiloone kawoy enta ubbaa Hamaata biittan Rabila kataman wodhis. Hessada hanidi, Yihuda asay banta biittafe di7etidi bidosona.

22Kawoy Nabukadanaxoori Safaana na7aa na7aa, Akqaama na7aa Godoliya Yihudan attida asaa bolla shuumis.

23Kushe immiboona Yihuda toora moconatinne olanchoti hessa si7ida wode, Mixiphan de7iya Godoliyara gahetidosona. He halaqati Naatana na7aa Isma7eela, Qareya na7aa Yohaana, Naxoofa addiya Tanhumeta na7aa Sarayanne Makata addiya Yazaana na7aa.

24Godoliya entawunne enta olanchotas “Haysatasinne enta halaqatas yayyofite. Ha biittan de7ite; Babiloone kawas haaretite; hessa hinte oothiko ubbabay hintew injetana” yaagidi entaw caaqis.

25Shin laapuntho ageenan, kawo kochi gidida Elisaama na7aa Naatana na7ay Isma7eeli tammu asara Mixipha bidi, Godoliya, Yihuda asaanne iyara de7iya Babiloone asa ubbaa wodhis.

26Hessafe guye, Babiloone asaas yayyidi, Yihuda asay, guuthi giti attonnashin, toora moconati ubbay Gibxe biitta baqatidosona.

27Yo7akini di7etidi bida hastamanne laapuntho laythan, tammanne nam7antho ageenan, laatamanne laapuntho gallasan, Yoor-Marodaaki kawotida laythi, Yihuda kawa Yo7akina maaridi qashope billis.

28Yoor-Marodaaki, Yo7akinara lo77o qaala odetidi, Babiloonen di7on de7iya hara kawota ubbaafe aathidi, iya bonchis.

29Hessa gisho, Yo7akini qasho keethan ma7ida ma7uwa laammidi, attida ba de7o laytha ubban kawo gaytape mis.

30Gallas gallas iyaw koshshiyaba ubbaa Babiloone kawoy immis.