2 Chronicles 19

Amharic Gofa GFBLVF (Geeshsha Maxaafa)

1Hessafe guye, kawoy Iyosaafexi Yerusalaamen de7iya ba gadho saro simmis.

2Qoncethi be7iya, Anaana na7ay Iyyuy kawa Iyosaafexara gahetanaw keyidi, “Neeni iitata maaddanaw woyko Godaa ixeyisata dosanaw bessii? Hessa gisho, Godaa hanqoy ne bolla yis.

3Gidoshin, Asheera eeqa misileta biittafe diggida gishonne Xoossaa koyanaw ne wozanaa giigisida gisho neeni lo77oba oothadasa” yaagis.

4Iyosaafexi Yerusalaamen de7is. Barsaabepe doomidi derey dariya Efreema biitta gakanaw asaa giddon yuuyidi, Godaako, enta aawata Xoossaako enta zaaris.

5Yihuda biittan de7iya gimbetida katamata ubban daynnata shuumis.

6Entako, “Hinte pirdey asasa gidonashin, hinte pirdiya wode Goday hintera de7iya gisho hinte pirdiya wode naagetite.

7Ha77ika Godaas yayyite; Godaa nu Xoossaa matan naaqoy, som7o xeellidi maaddeynne wodhaafe ekoy bayna gisho akeekidi pirdite” yaagis.

8Qassi, Godaa higgiya polisana melanne asaa giddon dendiya mootuwa pirdana mela Leewetape, kahinetapenne Isra7eele asaa soo halaqatape guutha asata Iyosaafexi Yerusalaamen shuumis.

9Iyosaafexi enta haysada yaagidi kiittis; “Godaas yashshan, ammanetethaninne kumetha wozanan oothite.

10Banta kataman de7iya hinte ishati shempo wodhon, higge woyko kiita woyko awaajo menthon hinteko yiiko, enti Godaa sinthan bala gidonnaada, iya hanqoy hinte bollanne hinte ishata bolla yoonnaada enta seerite. Hinte enta seeriko hinte hinte huuphen bala gideketa.

11Godaaba gidida ubban kahineta halaqaa Amaare; kawoba gidida ubban Yihuda kochaas halaqa gidida Isma7eela na7aa Zabada shuumas. Leeweti hinte bolla halaqa gidana. Hinte minnidi oothite; suureba ootheysara Goday gido” yaagis.

← Chapter 18 Chapter 20 →