1 Peter 5

Amharic Gofa GFBLVF (Geeshsha Maxaafa)

1Hiza, woosa keethaa cimatara cima gididaysi, Kiristoosa waayiya markateysinne qoncanaw de7iya bonchuwa shaaketanaw de7iya taani, hinte giddon de7iya cimata zorayis.

2Hinte aawatethafe garsan de7iya Xoossaa wudiya heemmite. Xoossay koyeysada dosanaape attishin, un7etidi heemmofite. Qassi miishe koshshan gidonashin, haggaazanaw de7iya lo77o qofan heemmite.

3Hinte aawatethafe garsan de7iya wudiyas leemiso giditepe attishin, godatopite.

4Heemmeyisata halaqay qonciya wode qolettonna boncho kallacha hinte ekana.

5Hessadaka, yalagato, cimatas haaretite. Hinte issoy issuwas ashke gidite. Geeshsha Maxaafan, “Xoossay otoranchota ixees, shin ashketas aadho keehatetha immees” yaagees.

6Xoossay ba wode hintena bonchana mela wolqaama Xoossaa kushiyape garsan hintena kawushite.

7I hintew qopiya gisho hintena hirgisiya ubbaa iya bolla yeggite.

8Hinte morkey Xalahey, mittiyaba koyidi, gaammoda gudishe hinte matara yuuyiya gisho hintena haaritenne barkite.

9Alamen de7iya hinte ishati hessada waaye ekeysa eridi, ammanon minnidi, Xalahiyara eqetite.

10Ba merinaa bonchuwas Kiristoos Yesuusa baggara hintena xeegida aadho keehatetha ubbaa Xoossay, guutha wodes hinte waayetidaape guye, I ba huuphen hintena shiishana, katisana, minthidi essana, xaalisana.

11Merinaape merinaa gakanaw Xoossay kawoto. Amin7i.

12Ammanetida ishaa gada ta ekiya Sillaase baggara ha dabdaabiya hintew qanthan xaafas. Ta hessa hintew xaafiday, hintena zoranawunne Xoossaa aadho keehatethay tuma gideysa markatanaasa. He aadho keehatethan minnidi eqite.

13Hintera issife dooretida Babiloonen de7iya woosa keetha asaynne ta na7aa Marqoosi hintena, “Saro saro” yaagees.

14Siiqo yeeretetha yeeretishe, issoy issuwa sarothite. Kiristoosan de7iya hinte ubbaas saroy gido. Amin7i.