Revelation 22

Amharic Gofa GFBEVF (ጌሻ ማፃፋ)

1ያትድ፥ ኪታንቾይ ታና ፆሳ ካዎተ አራታፐነ ዶርሳ ካዎተ አራታፐ ጎግያ ማስቶተዳ ጶልያ ደኦ ሃ ሻፋ በስስ።

2ሄ ሻፋይ ካታማ ኦግያ ግዶራ ዱገ ጎጌስ። ሻፋፐ ሄፍን ባጋራነ ሀፍን ባጋራ አጌናን እስ ቶሆ፤ ላይን ታማነ ናምኡ ቶሆ አይፍያ ደኦ ም ደኤስ። ሄ ም ቦንጮይ ካዎተታ ኡባ ሀርገፈ ፓስ።

3ሄ ካታማን አይብ ባደካ ዴና። ፆሳ ካዎተ አራታይነ ዶርሳ ካዎተ አራታይ ሄ ካታማን ዳና። ፆሳ አይለት ፆሳስ ኦና።

4ኤንቲ እያ ሶምኡዋ በአና፤ እያ ሱንይ ኤንታ ሶምኦን ፃፈታና።

5ህዛፐ ቃም ዴና፤ ጎዳ ፆሳይ ኤንታዉ ፆምፐ ግድያ ግሾ ኤንታዉ ፆምፐ ዎይኮ አዋ ፖኦ ኮሸና። ኤንቲ መር መርናዉ ካዎታና።

6ኪታንቾይ ታኮ፥ “ሀ ታ ኦድያ ቃላይ ቱማነ አማንይሳ። ጎዳይ፥ ናበታ ባ ጌሻ አያናን ኪትያ ፆሳይ፥ ማታን ሀናናባ ባ አይለታ በሳናዉ ባ ኪታንቹዋ ኪትስ” ያግስ።

7የሱሲ፥ “ሄኮ ታ ኤለሳዳ ያና፤ ሀ ማፃፋን ደእያ ትንብተ ቃላ ናግያ ኦንካ አንጀትዳይሳ” ያግስ።

8ታኒ፥ ዮሃንስ፥ ሄ ኡባባ ስአስ፤ በአስ። ታኒ ሄሳ ስእዳ ዎደነ በእዳ ዎደ ሄሳ ታና በስዳ ኪታንቹዋ ጎይናናዉ እያ ቶሁዋ ቦላ ኩንዳስ።

9ሽን ኪታንቾይ ታኮ፥ “ሄሳ ኦፋ! ታኒ ኔዳ፥ ናበታዳ ነ እሻታዳነ ሀ ማፃፋን ደእያ ኡባ ኪተትያ አይለታ መላ፤ ፆሳ ጎይና” ያግስ።

10ኪታንቾይ ዛሪድ፥ “ሀ ኡባይ ፖለትያ ዎደይ ማታትዳ ግሾ ሀ ማፃፋን ፃፈትዳ ትንብተ ቃላ ማታመን ጎርዶፋ።

11ኢታ ኦይ ጉጅድ ኢታ ኦ፤ ቱነይ ጉጅድ ቱኖ። ሎኦ ኦይ ጉጅድ ሎኦ ኦ፤ ጌየይ ጉጅድ ጌዮ” ያግስ።

12የሱሲ፥ “ሄኮ፥ ታኒ ኤለሳዳ ያና። እሱዋስ እሱዋስ እያ ኦሱዋዳ እማናዉ ታ ዎይቶይ ታራ ደኤስ።

13ታኒ አልፋነ ኦመጋ፤ ኮይሮነ ዉርሰ፤ ዶመነ ፖሎ።

14“ባንታ ማኡዋ ሜጭድ ጌሸይሳት አንጀትዳይሳታ። ደኦ ም አይፍያ ማናዉነ ካታማ ፐንግያራ ገላናዉ ኤንታዉ ማት እመትስ።

15ሽን ካናት፥ ብተይሳት፥ ላይማተይሳት፥ ሸምፖ ዎይሳት፥ ኤቃ ጎይነይሳት፥ ዎርዶ ዶሰይሳትነ ኦይሳት ካረን ደኦሶና።

16“ታኒ፥ የሱሲ፥ ሀ ማርካተ ህንተዉ፥ ዎሳ ኬታስ ኦዳና መላ ታ ኪታንቹዋ ኪታስ። ታኒ ዳዊታ ሼሽነ ኮቸ። ታኒ ፖእያ ጉራ ባካላ” ያግስ።

17ጌሻ አያናይነ ገላናዉ ጊግዳ ማጫስያ፥ “ሃያ” ያጎሶና። ቃስ ሀይሳ ስእያ ኦንካ፥ “ሃያ” ያጎ። ሳሞትዳ ኦንካ ሃዮ፤ ደኦ ሃ ኮይያ ኦንካ ጮ ኤኮ።

18ታኒ ሀ ማፃፋን ፃፈትዳ ትንብተ ቃላ ስእያ ኦናካ ዞራይስ። ኦንካ ሀ ቃላ ቦላ እስባ ጉጅኮ፥ ፆሳይ ሀ ማፃፋን ፃፈትዳ ቦሻ እያ ቦላ ጉጃና።

19ኦንካ ማፃፋን ደእያ ትንብተ ቃላፐ እስባ ፓጭስኮ፥ ፆሳይ ሀ ማፃፋን ፃፈትዳ ደኦ ም አይፍያፐነ ጌሻ ካታማፐ እያ ቃዳ ፓጭሳና።

20ሀ ኡባ ማርካተይስ፥ “ቱማ፥ ታኒ ኤለሳዳ ያና” ያጌስ። አምንእ፤ ጎዳ የሱሳ፥ ሃያ።

21ጎዳ የሱስ ክርስቶሳ አ ኬሀተይ ህንተ ኡባራ ግዶ። አምንእ።