Psalms 88

Amharic Gofa GFBEVF (ጌሻ ማፃፋ)

1ጎዳዉ፥ ታና አሽያ ፆሳዉ፥ ታኒ ጋላስ ኔኮ ዋሳይስ፤ ቃማ ነ ስንን ዬካይስ።

2ታ ዎሳይ ነ ስን ጋኮ፤ ነ ሀይይ ታ ዋሱዋ ስኦ።

3ታ ሸምፖይ መቶ ካልዳ ግሾ፥ ታ ደኦይ ዱፎኮ ማትስ።

4ዱፎ ገልያ አሳራ ታይበታስ፤ ዎልቅ ባይና አስ ግዳስ።

5ታኒ አሀታ ግዶን የገትዳ አሳ መላ፤ ሀይቅድ ዱፎን ዝንእዳ አሳ መላ። ህዛፐ ኔኒ ሀሳዮና አስነ ኔፐ ዱፅዳ አሳ መላ ግዳስ።

6ኔኒ ታና ጪሞን፥ ማ ኦላን የጋዳሳ።

7ነ ሀንቆይ ታና ዴፄስ፤ ነ ሀንቁዋ ቤታይ ታና ሙክስ።

8ኔኒ ታ ዳቦታ ታፐ ሃሳዳሳ፤ ኤንቲ ታና ሻተታና መላ ኦዳሳ። ታና ተቅዶሶና፤ ከሳ ኤካናዉ ዳንዳእከ።

9ጎዳዉ፥ አዛኖን ታ አይፈይ ተልጁምስ፤ ኡባ ጋላስ ታኒ ኔኮ ዋሳይስ፤ ታ ኩሽያ ኔኮ ምጫስ።

10ሀይቅዳይሳታስ ነ ማላልስያባ ኦዬ? ኤንቲ ደንድድ ነና ጋላቶናዬ?

11መርና ነ ሲቆይ ዱፎን፥ ነ አማነተይ ዮ በሳን ኦደትዬ?

12ነ ማላልስያ ኦሶይ ማን፥ ነ ፅሎተይ ዶገትዳ ቢታን ኤረትዬ?

13ጎዳዉ፥ ታ ኔኮ ዋሳይስ፤ ዎንታ ዎንታ ታ ዎሳይ ነ ስን ጋኬስ።

14ጎዳዉ፥ ነ ታና አይስ እፃይ? ነ ሶምኡዋ ታፐ አይስ ገንይ?

15ናአተፈ ዶማዳ ታኒ ኡንኤታስ፤ ሀይቆስ ማታስ፤ ነ ታና ዳጋንን ኡፋይስ ቃንፃስ።

16ነ ሱልያ ሀንቆይ ታ ቦላ ኡሽስ፤ ነ ዳጋንይ ታና ይስስ።

17ኤንቲ ጋላስ ኩመ ድኦዳ ታና ተቅዶሶና፤ እስፈ ሺቅድ ታና ኦይክዶሶና።

18ታ ላገታነ ታዉ ማታ አሳታ ታፐ ሃሳዳሳ፤ ታዉ ዳቦይ ማ ፃላላ።

← Chapter 87 Chapter 89 →