Psalms 109

Amharic Gofa GFBEVF (ጌሻ ማፃፋ)

1አቤት ታ ነና ጋላትያ ፆሳዉ፥ ነ ታዉ ስእ ጎፓ።

2ኢታ አሳትነ ዎርዳንቾት፥ ባንታ ዶና ታ ቦላ ዶይዶሶና፤ ባንታ ዎርዶ እንፃርሳን ታ ቦላ ሃሳዮሶና።

3እፆን ታ ዩሹዋ ተቅዶሶና፤ ጋሶይ ባይና ታና ኦልዶሶና።

4ታ ኤንታ ዶሳይስነ ኤንታዉ ዎሳይስ፤ ግዶሽን፥ ኤንቲ ታና ሞቶሶና።

5ታ ሎኦ ኦን፥ ታዉ ኢታ ዛሮሶና፤ ታ ኤንታ ዶስን፥ ኤንቲ ታና እፆሶና።

6ታ ሞርክያ ቦላ ኢታ ዳይና ሹማ፤ ሞታንቾይ እያ ኡሻቻን ኤቆ።

7እያ ፕልግያ ዎደ እ ባላ ግድድ በንቶ፤ እያ ዎሳይ እያዉ ጎመ ግዶ።

8እያ ላይይ ቃሞ፤ እያ ሹማተ ሀር ኤኮ።

9እያ ናይት ይኦ ግዶ፤ እያ ማችያ አምኦ ግዶ።

10እያ ናይት ዎሳንቾ ግድድ ቶይላቶ፤ ባንታ ደእያ ሁምፓ ኬፈ ጎደቶ።

11እያ ሻሎ ኡባ አጮይ ኦይኮ፤ እ ዳቡርድ ከስዳባ ኡባ አላግ ቦንቆ።

12ኦንካ እያዉ ኬሆፖ፤ እያ ናይታስ ቃትያ አስ በንቶፎ።

13እያ ናይት ኡባይ ሀይቅድ ዉሮ፤ ካልያ የለተን እያ ሱንይ ዶገቶ።

14እያ አዋታ ናጋራይ ጎዳ ስንን ቆፈቶ፤ እያ አየ ናጋራይ ቁሸቶፎ።

15ጎዳይ ኤንታ ናጋራ ኡባ ዎደ ቆፖ፤ ኤንቲ ሳአ ቦላ ሀሳየቶፎ።

16እ ኬሀ ኦናዉ ፖሎ ቆፕቤና፤ ማንቆታ፥ መቶታንቾታ፥ ቆሄትዳይሳታ ጎድድ ዎስ።

17እ ባዳናዉ ዶስዳ ግሾ፥ እ ባደትዳይሳ ግዶ። እ አንጃናዉ ዶሶና ግሾ፥ እያ አንጆይ እያፐ ሃክስ።

18ባደ እያ አፍላዳ ማእስ፤ እያ ባደ ሃዳ እያ ቦላ ላክስስ፤ ዛይተዳ እያ መቀ ግዶ ገሎ።

19አፍላዳ እያ ካሞ፤ ዳንጮዳ ኡባ ዎደ እያ ፄሳን ደኦ።

20ሀ ታና ሞተይሳነ ታ ቦላ ኢታ ኦደተይሳታ ጎዳይ ሄሳዳ ኦድ ሴሮ።

21ሽን አቤት ኡባ ሃርያ ጎዳዉ፥ ነ ሱን ግሾ ታና ማዳ። ነ መርና ሲቁዋነ ነ ኬሀተ ግሾ ታና አሻ።

22ታኒ ማንቆነ መቶታንቾ አስ፤ ታ ዎዛናይ ማዱንፅስ።

23ታ ኦማርሳ ኩያዳ ያና ሀናይስ፤ ታ ቦለዳ ቆቆፈታስ።

24ፆማን ታ ጉልባታይ ዳቡርስ፤ ታ አሳተይ ላፍን መቀ አትስ።

25ታና ሞተይሳታስ ቀልቅሰስ አታስ፤ ታና በእድ፥ ባንታ ሁጵያ ቃሶና።

26አቤት ጎዳዉ ታ ፆሳዉ፥ ታና ማዳ፤ መርና ነ ሲቁዋዳ ታና አሻ።

27ነ ኩሸይ ሀይሳ ኦዳይሳነ፥ ነ ሀይሳ ኦዳይሳ ታ ሞርከት ኤሮ።

28ኤንቲ ታና ባዶሶና፥ ሽን ነ ታና አንጃና፤ ታና ጎደይሳት ዬላቶ፤ ሽን ነ ታና ኡፋይሳ።

29ታና ሞተይሳት ዬላ ማኦ፤ ባንታ ካዉሻ አፍላዳ ማኦ።

30ታኒ ታ እንፃርሳን ጎዳ ጋላታና፤ ደርያ ሺቁዋን እያ ሳባና።

31እ ማንቆታ ግሾ ሞተቴስ፤ ሀይቆስ ፕርደትዳይሳታ አሼስ።

← Chapter 108 Chapter 110 →