Micah 7

Amharic Gofa GFBEVF (ጌሻ ማፃፋ)

1ታና አየ! ታኒ ቴራ አይፈይ ማፀትድ ዉርን፥ ዎይንያፐነ ባላሰ ምፈ ባ አሞትዳይሳ ደማናዉ ዳንዳእቦና ኮሻትዳ ኡራ መላ ግዳስ።

2ፆሳ አስ ቢታን ባዋ፤ አሳ ጋርሳን ሱረ አስ ይስ። አስ ኡባይ አሳ ሱ ጉሳናዉ ሆክድ ናጌስ፤ ኡባይ ባ እሻ ግተን ኦይካናዉ ካሌስ።

3ኤንታ ናምኡ ኩሸት ኢታባ ኦናዉ ሎህዶሶና። ሀላቅነ ዳይን ዎፈ ኦይቾሶና፤ ዎልቃራ ደእያ አሳት ባንታ ኮይዳባ ዎልቃን ፖልሶሶና። ኤንቲ ኡባይ እስፈ ፕርዳ ምርቅድ ይሶሶና።

4ኤንታ ጋርሳን ኬሀ ጌተተይስ አጉን መላ፤ ሱረ ጌተተይስ ክንቾተ መላ። ጎዳይ ናበታ ባጋራ ኦድዳይሳዳ እ ባ አሳ ሴራና ጋላሳይ ጋክስ፤ ኤንቲ ያርካና ዎደይ ሀእ ማትስ።

5ነ ሾሩዋ አማኖፓ፤ ነ ላግያን አማነቶፋ። ኔራ ደእያ ነ ማቸፈ ነ ዶና ናጋ።

6ሄ ዎደ ናአይ ባ አዋ ካስ፤ ናእያ ባ አየ ቦላ፥ ናኣ ማችያ ባ አዝና አየ ቦላ ሞርከተን ደንዳና። አሳስ እያ ሶ አሳይ ሞርከ ግዳና።

7ሽን ታኒ ኡፋይሳን ጎዳ ፄላና፤ ታና አሽያ ፆሳ ናጋና፤ ታ ፆሳይ ታና ስአና።

8ታ ሞርክያዉ፥ ታ መቱዋን ኡፋይቶፋ፤ ታኒ ኩንድኮካ ደንዳና፤ ታ ማን ኡትኮካ ጎዳይ ታዉ ፖአና።

9ታኒ ጎዳ ናቃስ፤ እ ታዉ ሞተትድ፥ ታባ ፕርዳና ጋካናዉ፥ ታኒ እያ ሀንቁዋ ዳንዳአና። እ ታና ፖኦን ከሳና፤ ታኒ እያ ፅሎ ፕርዳ በአና።

10ሄ ዎደ ታ ሞርከይ ሄሳ በአና፤ ታኮ፥ “ጎዳይ ነ ፆሳይ አዉን ደኢ?” ያግድ ቀልቅስዳይ ዬላ ማአና። እ ኦገን ደእያ ኡርቃዳ የትን፥ ታኒ ታ አይፈን በአና።

11ህንተኖ፥ እስራኤለ አሳዉ፥ ህንተ ካታማ ግምበ ድርሳት ድረትያ ጋላሳይ ያና፤ ሄ ጋላስ ህንተ ዛዋይ አካና።

12ሄ ጋላስ ህንተ አሳይ ህንተኮ ስማና። ኤንቲ አሶረፐ፥ ግብፀፈ፥ ኤፍራፂሳ ሻፋ ሄራን ደእያ ቢታታፐ፥ ሃሆ በሳን ደእያ አባ ጋፃፐነ ቃ ዙማታፐ ህንተኮ ስማና።

13ሽን ቢታይ እያ ቦላ ደእያ አሳ ኢታተ ጋሶን አስ ባይና ባይሳ ግዳና።

14ኔኒ ባዞን ባርካ ደእያ፥ ነ ላታ ደርያ ነ አራዳ ቢታን ነ አሳ ሄማ። ኤንቲ ካሰ ዎድያዳ ባሳነንነ ጋላዳን ሄመታና መላ ኦ።

15ጎዳይ፥ “ህንተ ግብፀፐ ከይዳ ዎድያዳ ታኒ ህንተና ማላልስያባ በሳና” ያጌስ።

16ኤንታ ዎልቃይ ግታ ግድኮካ፥ ካዎተት ኡባይ ሄሳ በእድ ዬላታና። ኤንቲ ዬላትድ፥ ባንታ ዶና ኦይካና፤ ኤንታ ሀይይ ቱላና።

17ኤንቲ ሾሻዳነ ሳአራ ጎሸትያ መተታዳ ቢታ ላጫና። ኤንቲ ባንታ ሚፃፐ ኮኮርሸ ከይድ ግታ ዳጋማን ጎዳኮ፥ ኑ ፆሳኮ፥ ስማና፤ ኤንቲ ጎዳ ያይድ ዳና።

18ናጋራ ኡባ አቶ ያገይ፥ አትዳ ባ አሳ ናቁዋ ታይቦናይ ነ መላ ፆሲ ኦኔ? ማሮተ ነና ኡፋይስያ ግሾ ነ ሀንቁዋን መርናዉ ጋምአ ኤራካ።

19ኔኒ ዛራዳ ነ አሳስ ቃታሳ፤ ኑ ናቁዋ ነ ቶሁዋን የሳ፤ ኑ ናጋራ አባ ጪሞን ሆላሳ።

20ኔኒ በን ኑ ማይዛታስ ጫቅዳ ጫቁዋዳ አብራሃመነ ያይቆባ ዛረ ግድዳ ነ አሳስ ነ አማነተነ ነ መርና ሲቁዋ በሳና።