Matthew 19

Amharic Gofa GFBEVF (ጌሻ ማፃፋ)

1የሱሲ ሄሳ ኦድ ኦንግዳፐ ጉየ፥ ጋልላፐ ደንድድ ዮርዳኖሰ ሻፋፐ ሄፍንን ደእያ ይሁዳ ቢታ ብስ።

2ዳሮ አሳይ እያ ካልድ ብን ኤንታ ግዶፈ ሀርጋንቾታ ፓስ።

3ፋርሳወት እያ ፓጫናዉ ኮይድ እያኮ ይድ፥ “እስ አስ አይ ጋሶንካ ባ ማችዉ የዳናዉ በሲ?” ያግድ ኦይችዶሶና።

4የሱሲ ዛሪድ፥ “ፆሳይ ኮይሮ አደነ ማጫስ ኦ መዳይሳ ህንተ ናባብበከቲ?

5‘ሄሳ ግሾ፥ እስ አስ ባ አዋነ ባ አይዉ አግድ ባ ማቸራ እስኖ ግዴስ፥ ናምአይካ እስ አሾ ግዶሶና።’

6ሄሳ ግሾ፥ ኤንቲ እስ አስ ግዶሶናፐ አትሽን፥ ናምኡ አስ ግዶኮና። ህዛ፥ ፆሲ ቃችዳይሳ አስ ሻኮፎ” ያግስ።

7ፋርሳወት፥ “ያትን፥ ሙሰይ እስ አስ አንጆ ዎርቃተ እምድ የዳና መላ አይስ ኪትዴ?” ያግድ ኦይችዶሶና።

8የሱሲ ዛሪድ፥ “ህንተ፥ ህንተ ማቸታ የዳና መላ ሙሰይ ህንተና ኪትዳይ፥ ህንተ ዎዛና ምኖተ ግሾፐ አትሽን፥ ኮይሮፐ ሄሳ መላ ግደና።

9ታ ህንተዉ ኦዳይስ፤ ባ ማችያ ላይማቶና ደእሽን የድድ ሀራ ኤክያ ኦንካ ላሜስ” ያግስ።

10እያ ታማረት እያኮ፥ “አዝናባይነ ማችባይ ሄሳ መላ ግድኮ ኤኮ ገሎይ አትኮ ሎኦ” ያግዶሶና።

11የሱሲ ዛሪድ፥ “ሄሳ መላ ትምርተይ ፆሳይ ዳንዳአ እምዳይሳታሳፈ አትሽን፥ አሳ ኡባሳ ግደና።

12ህዛ፥ የለትሸ ሹፋ ግድድ የለትዳይሳት ደኦሶና፥ ቃስ አስ ቃራትዳይሳት ደኦሶና፥ ቃስ ሳሎ ካዎተ ግሾ ግድ ባንታና ሹፋይዳይሳት ደኦሶና። ሄሳ ግሾ፥ ሀይሳ ኤካናዉ ዳንዳእያ ኦንካ ኤኮ” ያግስ።

13የሱሲ ባ ኩሽያ ጉ ናይታ ቦላ ዎድ ኤንታዉ ዎሳና መላ እስ እስ አሳይ ናይታ እያኮ ኤህዶሶና። ሽን እያ ታማረት አሳ ሀንቀትዶሶና።

14ሽን የሱሲ፥ “ፆሳ ካዎተይ ሀይሳታ መላሳ ግድያ ግሾ፥ ጉ ናይት ታኮ የይሳ ድጎፍተ፤ ዮ ጊተ” ያግስ።

15ባ ኩሽያ ኤንታ ቦላ ዎዳፐ ጉየ ሄ በሳፈ አግድ ብስ።

16እስ ጋላስ እስ ኡራይ የሱሳኮ ይድ፥ “አስታማርያዉ፥ ታኒ መርና ደኦ ደማናዉ አይ ሎኦባ ኦ?” ያግስ።

17የሱሲ እያኮ፥ “ሎኦባ ነ ታና አይስ ኦይቻይ? እስ ፆሳፈ አትሽን፥ ሀር ሎኦይ ባዋ። ሽን ኔኒ መርና ደኡዋ ኤካናዉ ኮይኮ ኪታታ ናጋ” ያግስ።

18ኡራይ ዛሪድ፥ “አዉሳ ኪታታ” ያግድ ኦይችስ። የሱሲ ዛሪድ፥ “ዎፓ፥ ላይማቶፓ፥ ካይሶቶፓ፥ ዎርዶ ማርካቶፋ፥

19ነ አዋነ ነ አይዉ ቦንቻ፥ ነ ሾሩዋ ነ ሁጰዳ ዶሳ” ያግስ።

20ሄ ናአተይ፥ “ታኒ ሀይሳታ ኡባ ናአተፈ ዶማዳ ናጋስ። ያትን፥ ሀር ታዉ ፓጭያባይ አይቤ?” ያግድ ኦይችስ።

21የሱሲ ዛሪድ፥ “ኔኒ ፖሎ ግዳናዉ ኮይኮ ባዳ ነዉ ደእያባ ባይዛዳ ማንቆታስ እማ፤ ኔኒ ሳሎን ዱረታና። ያታ ስማ ያዳ ታና ካላ” ያግስ።

22ሽን ሄ ናአተ ኡራይ ዳሮ ዱረ ግድያ ግሾ፥ ሄሳ ስእዳ ዎደ አዛንሸ አግድ ብስ።

23ሄሳፈ ጉየ፥ የሱሲ ባ ታማረታ፥ “ታኒ ህንተዉ ቱማ ኦዳይስ፤ ዱረይ ሳሎ ካዎተ ገላናይስ ዳሮ መቶ።

24ዱረ አስ ፆሳ ካዎተ ገላናይሳፈ ግማለይ ናርፐ ሉሆራ አይስ ካዉዬስ” ያግስ።

25የሱሳ ታማረት ሄሳ ስእድ ማላለትድ፥ “ያትን፥ ኦን አታናዉ ዳንዳኢ?” ያግድ ኦይችዶሶና።

26የሱሲ ኤንታ ጫድ ፄልድ፥ “ሀይስ አሳስ ዳንዳኤተና፥ ሽን ፆሳስ ኡባይ ዳንዳኤቴስ” ያግስ።

27ጰፅሮስ ዛሪድ፥ “ኑኒ ኡባባ አግድ ነና ካልዳ። ያትን፥ ኑኒ አይ ደማኔ?” ያግስ።

28የሱሲ ኤንታኮ ሀይሳዳ ያግስ፦ “ታኒ ህንተዉ ቱማ ኦዳይስ፤ አሳ ናአይ ያና አላምያን ባ ቦንቾ አራታን ኡትያ ዎደ ህንተ ታማነ ናምአት፥ ታና ካልዳይሳት፥ ታማነ ናምኡ አራታን ኡትድ ታማነ ናምኡ እስራኤለ ዘረታ ቦላ ፕርዳና።

29ታ ሱን ግሾ ኬ ዎይኮ እሻታ ዎይኮ ምቸታ ዎይኮ አዋ ዎይኮ አይዉ ዎይኮ ናይታ ዎይኮ ጋዴ አግዳይ ኦንካ ፄቱ ኩሸ ኤካና። ቃስ መርና ደኡዋካ ኤካና።

30ሽን ዳሮት ሀእ ደን ስን ግድዳይሳት ጉየ ግዳና፥ ቃስ ጉየ ግድዳይሳት ስን ግዳና” ያግስ።

← Chapter 18 Chapter 20 →