Joshua 23

Amharic Gofa GFBEVF (ጌሻ ማፃፋ)

1ዳሮ ዎደ ጋካናዉ ጎዳይ እስራኤለ አሳ ኤንታ ዩሹዋን ደእያ ሞርከታፐ ሸምፕስስ። ሄ ዎደ እያሱይ ጭምን፥ ላይ ሱገትስ።

2እያሱይ፥ እስራኤለ አሳ ኡባ፥ ጭማታ፥ ሀላቃታ፥ ዳይናታነ ቶራ ሞጮናታ እስፈ ፄግድ፥ “ታኒ ሀእ ዳሮ ጭማስ።

3ጎዳይ፥ ህንተ ፆሳይ ሀ ቢታን ደእያ ካዎተታ ኦል ፆናና መላ ዋትድ ህንተና ማድዳኮ በእደታ።

4ዶሎሀን ዮርዳኖሰ ሻፋ፥ ዉሎሀን መደትራነ አባ ጋካናዉ ደእያ ኦይከትዳ ቢታነ ኦይከቶና ቢታ ኡባ ህንተ ኮቻስ ሻካ እማስ።

5ጎዳይ፥ ህንተ ፆሳይ ኤንታ ህንተ ስንፈ ጎድድ ከሳና። ጎዳይ፥ ህንተ ፆሳይ ህንተዉ ጫቅዳይሳዳ ህንተ ኤንታ ቢታ ላታና።

6“ሙሰ ህገ ማፃፋን ፃፈትዳ ኡባ ምንድ ናግተነ ፖልተ፤ እያፐ ኡሻች ዎይኮ ሀድርስ ጎፕተ።

7ህንተ ግዶን አትዳ ደርያራ ዋላከቶፍተ። ኤንታ ፆሳታ ሱን ፄጎፕተ ዎይኮ ኤንታ ሱንን ጫቆፍተ። ኤንታዉ ኦፍተ ዎይኮ ኤንታዉ ጎይኖፍተ።

8ሽን ሀች ጋካናዉ ህንተ ኦዳይሳዳ ጎዳ ህንተ ፆሳስ አማነትተ።

9“ጎዳይ፥ ግታነ ምኖ ካዎተታ ህንተ ስንፈ ጎድድ ከስስ። ህንተራ ሀች ጋካናዉ ኦንካ ኤቀታናዉ ዳንዳእቤና።

10ጎዳይ፥ ህንተ ፆሳይ ህንተዉ ጫቅዳይሳዳ፥ እ ህንተዉ ኦለትያ ግሾ፥ ህንተፈ እስ አስ ሙኩሉ አሳ የደና።

11ጎዳ፥ ህንተ ፆሳ ኡባ ዎደ ሲቅተ።

12ሽን ህንተ ጉየ ስሚድ፥ ህንተ ግዶን አትዳ ደርያራ ዋላከትኮ፥ ህንተ ኤንታ ማጫሳ፥ ቃስ ኤንቲ ህንተ ማጫሳ ኤክድ ኤንታራ ቃሸትኮ፥

13ጎዳይ፥ ህንተ ፆሳይ ሄ ደርያ ህንተ ስንፈ ጎድድ ከሶናይሳ ኤርተ። ጎዳይ፥ ህንተ ፆሳይ ህንተዉ እምዳ ሀ ሎኦ ቢታፈ ህንተ ያና ጋካናዉ፥ ኤንቲ ህንተዉ ፅሄነ ግተ ግዳና። ኤንቲ ህንተ ዞኩዋስ ልሶ፥ ህንተ አይፍያስ አጉን ግዳና።

14“ሀእ ታ ሀይቃናዉ ማታስ። ጎዳይ፥ ህንተ ፆሳይ ህንተዉ እማና ግድ ጫቅዳ ሎኦባ ኡባፈ እሶይካ አትቦናይሳ ህንተ ኡባይ፥ ህንተ ዎዛናንነ ሸምፑዋን ኤሬታ። እ ህንተዉ እማና ግድ ጫቅዳባፐ እሶይካ አቶና ኡባይ ፖለትስ።

15ጎዳይ፥ ህንተ ፆሳይ ህንተራ ጫቅዳ ጫቁዋ ህንተ መንድ፥ ሀራ ፆሳታስ ኦኮነ ጎይንኮ፥ ጎዳ ሀንቆይ ህንተ ቦላ ኤፃና።

16ጎዳይ፥ ህንተ ፆሳይ ህንተዉ እማና ግድ ጫቅዳ ሎኦባ ኡባ አሾና ፖልዳይሳዳ፥ እ ህንተዉ እምዳ ሀ ሎኦ ቢታፈ ህንተና ይሳና ጋካናዉ ኢታ ኡባ ህንተ ቦላ ኤሀና። እ ህንተዉ እምዳ ሎኦ ቢታፈ ኤለስድ ህንተ ያና።”

← Chapter 22 Chapter 24 →