Joshua 20

Amharic Gofa GFBEVF (ጌሻ ማፃፋ)

1ሄሳፈ ጉየ ጎዳይ እያሱኮ ሀይሳዳ ያግስ፤

2“ታኒ ሙሰ ባጋራ ኪትዳይሳዳ፥ ‘አሳይ ባቃትድ አትያ ካታማታ ዱማያና መላ’ እስራኤለ አሳስ ኦዳ።

3ኦንካ ቆፖናነ ኤሮና አሰ ዎኮ፥ ያ ባቃትድ ጉክዳ ሱ ግሾ ሱ ዛራናዉ ኮያ ኡራፐ አታና።

4አሰ ዎዳይስ ሄ ካታማታፐ እሱዋኮ ባቃትድ ብድ፥ ካታማ ፐንገን ኤቅድ፥ ሀንዳባ ኡባ ሄ ካታማ ጭማታስ ኦዶ። ሄሳፈ ጉየ፥ ኤንቲ ባንታ ካታማ ኤፍድ፥ እ ዳና በሲ እምኮ ኤንታራ ያን ደኦ።

5ሱ ግሾ ሱ ዛራናዉ ኮያ ኡራይ እያ ካልድ ዪኮ፥ እ ባ እሻ ኤርድ፥ ቆሀናዉ ኮይድ ዎቦና ግሾ ሄ ካታማ ጭማት እያ አድ እሞፎ።

6ሻንጎ ስንን ሺቅድ፥ ፕርደታና ጋካናዉነ ሄ ዎደ ደእያ ካህነ ሀላቃይ ሀይቃና ጋካናዉ ሄ ካታማን ደኦ። ሄሳፈ ጉየ፥ ባቃትድ ከይዳ ካታማ ጉየ ስሚድ ባ ሶ ገሎ” ያግስ።

7ያትን እስራኤለ አሳይ ደረይ ዳርያ ንፍታለመን ጋልላን ደእያ ቃደሳ፥ ደረይ ዳርያ ኤፍሬማን ደእያ ሴከማነ ደረይ ዳርያ ይሁዳን ደእያ ቅርያት-አርባ ዎይኮ ከብሮና ዱማይዶሶና።

8ዮርዳኖሰ ሻፋፐ ሄፍንን፥ እያርኮፈ ዶሎሀ ባጋን ቃን፥ መላ ቢታን፥ ሮቤላ፥ ኮቻታ ቢታን ደእያ ቦሶራ፥ ጋዳ ኮቻታ ቢታን፥ ጋላዳን ደእያ ራሞታነ ምናሰ ኮቻታ ቢታን፥ ባሳነን ደእያ ጎላና ዱማይዶሶና።

9እስራኤለ አሳይነ ኤንታ ግዶን ደእያ በታንቾት ባቃትድ አታና መላ ዱማትዳ ካታማት ሀይሳታ። ኦንካ ኤሮና ደእሸ አሰ ዎኮ፥ ሻንጎ ስንን ፕርደቶና ደእሸ፥ ሀይቆና አታናዉ ሀ ካታማታፐ እሱዋኮ ባቃታናዉ ዳንዳኤስ።

← Chapter 19 Chapter 21 →