Job 42

Amharic Gofa GFBEVF (ጌሻ ማፃፋ)

1ሄሳፈ ጉየ፥ እዮብ ጎዳኮ ሀይሳዳ ያግድ ዛርስ፤

2“ነ ኡባባ ኦናዉ ዳንዳኤይሳነ ነ ቆፋ ተቃናዉ ዳንዳኤይ ባይናይሳ ታኒ ኤራስ።

3ነ፥ ‘ኤር ባይና ታ ዞርያ ቆሰይ ኦኔ?’ ያጋዳ ታና ኦይቻዳሳ፤ ቱማ ታኒ ታዉ ገልቦናባ፥ ታ ኤራፐ ቦላ ግድዳ ማላልስያባ ኦደታስ።

4“ኔኒ ታኮ፥ ‘ታኒ ኦድያ ዎደ ሀይዛ፤ ታኒ ኦይችያ ዎደ ዛራ’ ያጋዳሳ።

5ታኒ ካሰ ነባ ሀይን ስአስ፤ ሽን ሀእ ታ ነና አይፈን በአስ።

6ሄሳ ግሾ፥ ታ ኦዳን የላታዳ፥ ብዶ ቦላነ ባና ቦላ ኡታዳ ፓፃይስ” ያግስ።

7ጎዳይ ሄሳ እዮባስ ኦድዳፐ ጉየ፥ ተማናፐ ይዳ ኤልፋዛኮ ሀይሳዳ ያግስ። “ታ አይልያ እዮባዳ ህንተ ታባ ልከ ኦደትቦና ግሾ፥ ነ ቦላነ ነ ናምኡ ላገታ ቦላ ታ ሀንቆይ ኤፅስ።

8ሄሳ ግሾ፥ ሀእ ላፑን ኮርማታነ ላፑን ማራዘታ ኤክድ ታ አይልያ እዮባኮ ብድ፥ ፁሳ ያርሾ ህንተ ባላስ ያርሽተ። ታ አይልያ እዮብ ህንተዉ ዎሳና፤ ታኒ እያ ዎሳ ስአዳ ህንተ ሀኑዋ መላ ህንተና ሴርከ። ህንተ ታ አይልያ እዮባዳ ታባ ልከ ኦድበከታ” ያግስ።

9ሄሳፈ ጉየ፥ ተማናፐ ይዳ ኤልፋዝ፥ ሹሀፐ ይዳ በልዳዶስነ ናእማፐ ይዳ ሶፋር ብድ፥ ጎዳይ ኤንታ ኪትዳይሳዳ ኦዶሶና። ጎዳይ እዮባ ዎሳ ስእስ።

10እዮብ ባ ላገታስ ዎስዳፐ ጉየ፥ ጎዳይ እያ ዛሪድ ዱረይስ፤ እያዉ ካሰይሳ ግሾ ናምኡ ኩሸ እሚስ።

11ሄሳፈ ጉየ፥ እያ እሻት፥ እያ ምቸትነ ካሰ እያ ኤረይሳት ኡባይ እያኮ ይድ፥ እያ ሶን እያራ ግብራ ምዶሶና። እያዉ አዛንዶሶና፤ ጎዳይ እያ ቦላ ኤህዳ መቶ ኡባን እያ ምንዶሶና፤ ቃስ እያዉ ብራነ ዎርቃ ሳጋዮ እምዶሶና።

12ጎዳይ እዮባ ዉርሰ ላይ ኮይሮ ላይፈ አድ አንጅስ። እዮባስ ታማነ ኦይዱ ሙኩሉ ዶርሳት፥ ኡሱፑን ሙኩሉ ግማለት፥ እስ ሙኩሉ ዋፃ ቦራትነ እስ ሙኩሉ ማጫ ሀረት ደኦሶና።

13ቃስ እያዉ ላፑን አደ ናይታነ ሄ ማጫ ናይት የለትዶሶና።

14ባይራ ማጫ ናእዉ ይምሞ፥ ናምአንዉ ቃፅኦ፥ ሄንዉ ቀረንሀፉኮ ያግድ ሱንስ።

15እዮባ ማጫ ናይታዳ ማላ ሎኦ ማጫ ናእ አዉ ቢታን በንትቤና። ኤንታ አዋ ኤንታዉ ኤንታ እሻታራ ላታ ቢታ እሚስ።

16ሄሳፈ ስምን፥ እዮብ ፄታነ ኦይታሙ ላይ ደእስ። ባ ናይታነ ባ ናይታ ናይታ ኦይዳን የለተ ጋካናዉ በእስ።

17እዮብ ዳሮ ዎደ ደእድ፥ ሎኦ ጭማ ጭምድ ሀይቅስ።