Job 30

Amharic Gofa GFBEVF (ጌሻ ማፃፋ)

1ሽን ሀእ ታፐ ናአትያ አሳት ታና ቀልቅሶሶና። ኤንቲ ታ ዶርሳ ዉድያ ሄምያ ካናታራ ፔኦና መላ ታኒ ድግዳ አዋታ ናይታ።

2ኤንታ አዋት ዎልቅ እፅዳይሳታነ ግልቃታ ግድያ ግሾ ታና አይኮካ ማድቦኮና።

3መቶይነ ኮሽ ኡንኤን፥ ቢታ ባዞ ብድ ፃጶ ጮሞሶና።

4ጩማነ ቦንጮ ማፅዶሶና፤ ማልኦና ሳንካራ ፃጶ ምዶሶና።

5አስ ዋስሸ ካይሶ ጎደይሳዳ፥ ኤንታና አሳ ግዶፈ ጎድዶሶና።

6ኤንቲ ዛንጋራን፥ ጎንጎሎንነ ዛላ ቆጶን ደእዶሶና።

7ኤንቲ ዎራን ዶአዳ ዋስሸ ዩይዶሶና፤ አጉን ግዶን ሺቅድ እስፈ ደእዶሶና።

8ኤንቲ ቢታፈ ጎደትዶሶና፤ ሱን ባይና ኤያታ ግድድ ደእዶሶና።

9ሀእ ኤንታ ናይት ታና የን ጫዶሶና፤ ታኒ ኤንታ ግዶን ሀይሰስ አታስ።

10ኤንቲ ታና ሻተትድ ታፐ ሃኮሶና፤ ዬላቶና ታ ሶምኦን ጩቶሶና።

11ፆሳይ ታ ዎልቃ ላፈድ ታና ካዉሽዳ ግሾ፥ ኤንቲ ታና ቆሀናዉ የዳ ፓራ ግድዶሶና።

12ሴር ባይና ድጭዳ ናይት ታ ቦላ ደንድዶሶና፤ ታ ቶሁዋስ ፅሄ ዎዶሶና፤ ኤንቲ ታና ይሳናዉ ተቅዶሶና።

13ኤንቲ ታ ኦግያ ጎርድድ ታና ይሳናዉ ኮዮሶና፤ ኤንቲ ሄሳ ኦና መላ ተቅያ ኦንካ ባዋ።

14ኦላንቾት ካታማ ድርሳ መንድ ገለይሳዳ፥ ኤንቲ ታ ቦላ ይዶሶና።

15ታኒ ግታ ዳጋማ ዳጋማስ፤ ታ ቦንቾይ ጫርኮይ ኤፍያዳ ብስ፤ ታ ሳሮ ዱሳይ ሻራዳ ይስ።

16ታ ሸምፕያ ዳሮ ኡንኤታሱ፤ መቶይ ታና ጩጩምድ ኦይክስ።

17ቃማ ቃማ ሳሆይ ታ መቀ ጮሜስ፤ ሴላይ ታዉ ሸምፖ እመና።

18ፆሳይ ባ ግታ ዎልቃን ታ ማኡዋ ሺሽድ ኦይክስ፤ ቆ ኦይክያ ማኦዳ ታና ጩልስ።

19ፆሳይ ታና ኡርቃን ሆልስ፤ ታኒ ባናነ ብድን ግዳስ።

20አቤት ፆሳዉ፥ ታኒ ኔኮ ዋሳይስ፤ ሽን ኔኒ ታና አላባካ። ኤቃዳ ነና ዎሳስ፤ ሽን ኔኒ ታ ዎሳ ስአባካ።

21ኔኒ ታዉ ዎዛና ምኖ ግዳዳሳ፤ ነ ግታ ዎልቃን ታና የደሳ።

22ኔኒ ታና ጫርኮራ ደንዳ ጎዳዳሳ፤ ጎተን ታና ሀርቃዳሳ።

23አሳ ኡባስ ዉርሰ ግድዳ፥ ሀይቆስ ነ ታና አ እማናይሳ ኤራይስ።

24መቅዳ አስ፥ “ታና ማዳርክ” ግድ ዋስን፥ እያዉ ቃቶና አስ ደኢ?

25ዋየን ደኤይሳታስ ታ ዬካብክና? ማንቆታስ ታ ቃታብክና?

26ሎኦባ ደማና ጋዳ አሞታስ ሽን ኢታባይ ጋክስ፤ ታዉ ሳእ ኬሀና ጋዳ ናግስ ሽን ጋላስ ታዉ ምስ።

27ታ ዎዛናይ ህርጋ አግቤና፤ ታኒ ዎፓ ደማብከ፤ ኡንአ ቃም ታ ቦላ ጋክስ።

28ታ አሳተይ አዋ ሱሎን ግዶናሽን አዛኖን ካሬፅስ፤ ታኒ ደርያ ሺቁዋን ኤቃዳ ማደ ኮያይስ።

29ታኒ ዎራካናታስ እሻ፥ ዲድንስ ላገ ግዳስ።

30ታ ጎጋይ ካሬፅድ ፖቀት ፖቀት ዎስ፤ ታ አሳተይ ምሻን ፁገቴስ።

31ታ ኡፋይስ ቆንጭስያ ዲነ ሱሱልኤይ፥ ሀእ ታ ዘለልሳስ ግድስ።

← Chapter 29 Chapter 31 →