Job 27

Amharic Gofa GFBEVF (ጌሻ ማፃፋ)

1እዮብ ካልድ ሀይሳዳ ያግስ፤

2“ሱረ ፕርዳ ታና ድግድ፥ ታ ደኡዋ ጫሞ ኦዳ፥ ኡባ ዳንዳእያ ፆሳን ታኒ ጫቃይስ።

3ታ ሸምፖይ ደእሽን፥ ታ ሲይ ሸምፕሽን

4ታ ዶናይ ዎርዶ ኦደተና፤ ታ እንፃርሳይ ጭሞ ኦደተና።

5ህንተ ኦዳይ ልከ ጋዳ ታ ኤክከ፤ ሀይቃና ጋካናዉ ታ ታና ሱረ ገይሳ አግከ።

6ታ ፅሎተ ምን ኦይካናፐ አትሽን፥ አግከ፤ ታ ደእዳ ላይ ኡባን ታ ካሀይ ታና ሞተና።

7“ታ ሞርከት ናጋራንቾዳ፥ ታራ ኤቀተይሳት ባላ ግዶ።

8ፆሳይ ኤንታ ሸምፑዋ ኤንታፈ ኤክያ ዎደ፥ ኤንታ ላይ ቃምስያ ዎደ፥ ኢታታስ ደእያ ኡፋይሳይ አይቤ?

9ኤንታ ቦላ መቶይ ጋክያ ዎደ፥ ፆሳይ ኤንታ ዋሱዋ ስኢ?

10ኡባ ዳንዳእያ ፆሳን ኤንቲ ኡፋይታኔ? ኤንቲ ኡባ ዎደ ፆሳ ፄጋኔ?

11“ታኒ ህንተና ፆሳ ዎልቃባ ታማርሳና፤ ኡባ ዳንዳእያ ፆሳ ቆፋ ታ ህንተፈ ቆትከ።

12ህንተ ኡባይ ሄሳ በእደታ፤ ያትን፥ ሀይሳ መላ ጮ ሃሳያ አይስ ኦደቴቲ?

13ፆሳይ ኢታ አሳታስ ጊግስዳ ቃዳይ፥ ኡባ ዳንዳእያ ፆሳፈ ኤክያ ዎይቶይ ሀይሳ።

14ኤንታ ናይት አይ ዳርኮካ ኦላን ዉራና፤ ኤንታ ኮቻይ ምያባ ይድ ኮሻታና።

15ሄሳፈ አትዳይሳት ጋዶን ዉራና፤ ኤንታ አምኤት ኤንታዉ ዬኮኮና።

16ኢታ አሳት ብራ ቢታዳ ሺሽኮካ፥ ማኦ ኡርቃዳ ሺሽድ ዶርኮካ፥

17ኤንታ ብራ ፅሎ አሳት ሻክ ኤካና፤ ኤንታ ማኡዋ ጌሻት ማአና።

18ኤንቲ ኬፅያ ኬት ሻንጎ ሃዳ መላነ ጋባ መላ ላለታና።

19ኢታ አሳት ዱረ ግድድ ሂፃን ዝንኦሶና፤ ሽን ኤንቲ ስኮፈ ባርክያ ዎደ አይኮይካ ባዋ።

20ዳጋም ድኦ ሃዳ ቆፖና ኤንታ ቦላ ያና፤ ቃማ ጎተይ ኤንታ ደንድ ኤፋና።

21ዶሎሀ ጫርኮይ ኤንቲ ደእያሱዋፐ ፕትድ ኤፋና።

22ኤንቲ ከስ ኤካናዉ ባቃትሽን፥ ቃይ ባይና ኤንታ ቦላ ዎና።

23ባ ኩሽያ ባቅድ ኤንታ ቦላ ቀልቅሳና ባ ሱይቀን ኤንታ ሱግ የዳና።

← Chapter 26 Chapter 28 →