Jeremiah 24

Amharic Gofa GFBEVF (ጌሻ ማፃፋ)

1ካዎይ ናቡካዳናፆር፥ እዮአቄማ ናኣ፥ ይሁዳ ካዋ እኮንያና፥ ይሁዳ ሀላቃታራ፥ ኩሸ ሂላታራነ ብራታ ቆፀይሳታራ የሩሳላመፐ ባብሎነ ድእድ ኤፍዳፐ ጉየ፥ ጎዳይ ታና ቆንጨ በስስ። ጎዳይ ታና፥ ፆሳ ኬስ ስን ባጋራ ባላሰይ ደእያ ናምኡ ኬሸታ በስስ።

2እስ ኬሽያን ኮይሮ ቴርዳ ዳንያ ሎኦ ባላሰይ ደኤስ፤ ሀንኮ ኬሽያን ቃስ ማናዉ ጊጎና ኢታ ባላሰይ ደኤስ።

3ጎዳይ ታኮ፥ “ኤርምያሳ፥ ነ በኤይ አይቤ?” ያግድ ኦይችስ። ታኒ፥ “ባላሰ በአይስ፤ ሎኦ ቴራይ ዳሮ ሎኦ፤ ኢታ ቴራይ ቃስ ማናዉ ጊጎና ዳሮ ኢታ” ያጋስ።

4ሄሳፈ ጉየ፥ ጎዳ ቃላይ ታኮ ይስ፦

5ጎዳይ እስራኤለ ፆሳይ ሀይሳዳ ያጌስ፦ “ይሁዳ ቢታፈ ድኦን ባብሎነ ቢታ የድዳ አሳታ፥ ሀ ሎኦ ባላሰ ቴራዳ ሎኦ ጋና።

6ታኒ ሎኦ አይፈን ኤንታ ፄላና፤ ቃስ ኤንታ ዛራዳ ሀ ቢታ ኤሀና። ታ ኤንታ ኬፃናፐ አትሽን፥ ላልከ፤ ኤንታ ቶካናፐ አትሽን፥ ሾድከ።

7ታኒ ጎዳ ግድዳይሳ ኤንቲ ኤራና መላ ኤንታዉ ዎዛና እማና። ኤንቲ ባንታ ኩመ ዎዛናፐ ታኮ ስማናዉ ደእያ ግሾ፥ ኤንቲ ታ አሰ ግዳና፤ ታ ኤንታ ፆሰ ግዳና” ያጌስ።

8ግዶሽን፥ “ይሁዳ ካዋ ሰደቅያሳ፥ እያ ሞርናታ፥ ሀ ቢታን ግድን የሩሳላመን አትዳ አሳነ ግብፀ ቢታን ደኤይሳታ ማናዉ ጊጎና ዳሮ ኢታ ባላሰ ቴራዳ ኢታ ጋና።

9ታኒ ኤንታ ጎዳዳ የድያ ቢታ ኡባን፥ ሀ ሳአ ካዎተት ኤንታ በእድ ዳጋማና። ታኒ ኤንታ እፀትዳይሳታ፥ ጫየትዳይሳታ፥ ቦረትዳይሳታ፥ ሌምሰተይሳታ፥ ቀልቅሰተይሳታ፥ ባደትዳይሳታ ኦና።

10ታ ኤንታዉነ ኤንታ ማይዛታስ እምዳ ቢታፈ ኤንቲ ፖሎ ያና ጋካናዉ ማሻ፥ ኮሻነ ቦሻ ኤንታ ቦላ የዳና” ያጌስ ጎዳይ።

← Chapter 23 Chapter 25 →