James 4

Amharic Gofa GFBEVF (ጌሻ ማፃፋ)

1ኦሽነ ኦል ህንተ ግዶ አዉፐ ዪ? ኤንቲ የይ ህንተ አሳተ ሃራናዉ ኦለትያ ህንተ አሾ አሙዋፐ ግደነዬ?

2ህንተ አሞቴታ፥ ሽን ደመከታ፤ ሄሳ ግሾ፥ ዎታ። ምን ኮዬታ፥ ሽን ደማናዉ ዳንዳኤከታ፤ ሄሳ ግሾ፥ ኦየቴታነ ኦለቴታ። ህንተ ፆሳ ዎሶና ግሾ ኮያባ ደመከታ።

3ህንተ ዎሰታ፥ ሽን ደመከታ። ህንተ አሾ አሙዋ ፖላናዉ ዎበ ኦገን ዎስያ ግሾ ደመከታ።

4ህንተኖ፥ ላይማተይሳቶ! ሀ አላምያ ዶሰይ ፆሳራ ሞርከ ግደይሳ ኤረከቲ? ሀ አላምያራ ዳቦታናዉ ኮየይ ኦንካ ፆሳራ ሞርከ።

5ጌሻ ማፃፋይ፥ “ፆሳይ ኑናን ዳና መላ ኦዳ አያናይ፥ ኑኒ እያዉ ቡዞ ግዳና መላ አሞቴስ” ግዳይሳ ጮ ግዳባ ዳኒ?

6ሽን ጌሻ ማፃፋይ፥ “ፆሳይ ኦቶራንቾታ እፄስ፥ ሽን አሽከታስ ማሮተ እሜስ” ግያ ግሾ፥ ፆሳይ ማሮተ ዳርስድ እሜስ።

7ሄሳ ግሾ፥ ፆሳስ ሃረትተ፤ ፃላህያራ ኤቀትተ፤ እ ህንተፈ ሃካና።

8ፆሳኮ ሺቅተ፤ እ ህንተኮ ሺቃና። ህንተኖ፥ ናጋራንቾቶ፥ ህንተ ኩሽያ ሜጨትተ፤ ናምኡ ቆፍ ደኤይሳቶ፥ ህንተ ዎዛና ጌሽተ።

9ካዮትተ፥ ዬክተነ አፉፅተ። ህንተ ሚቻይ ዬሆን፥ ህንተ ኡፋይሳይ አዛኖን ላመቶ።

10ጎዳ ስንን ህንተናተ ካዉሽተ፤ ህንተና ቁ ቁ ኦና።

11ታ እሻቶ፥ እሶይ እሱዋ ዝግሮፕተ። ባ እሻ ዝግረይነ እያ ቦላ ፕርደይ ህገ ዝግረስነ ህገ ቦላ ፕርዴስ። ኔኒ ህገ ቦላ ፕርድኮ ህገ ቦላ ፕርደይሳ ግዳሳፐ አትሽን፥ ህገ ፖለይሳ ግዳካ።

12ህገ እመይነ ፕርደይ ፆሳ ፃላላ። አሻናዉነ ይሳናዉ ዳንዳኤይ እያ። ያትን፥ ነ አሳ ቦላ ፕርደይ ኔኒ ኦኔ?

13ህንተ፥ “ኑኒ ሀች ዎይኮ ዎንቶ ያ ካታማ ዎይኮ ሀ ካታማ ባና፤ ያን ላይ ኡታና፤ ዛልእድ ዎሳና” ያገይሳቶ፥ ስእተ።

14ዎንቶ አይብ ሀናኔኮ ህንተ ኤረከታ። ህንተ ደኦይ ዋናነኮ ኤረይ ኦኔ? ህንተ ጉ ዎደ በንትድ ይያ አካ መላ።

15ሄሳ አግድ፥ “ጎዳይ ጊኮ ኑኒ ዳና፤ ሀይሳ ዎይኮ ሄሳ ኦና” ያጋናዉ በሴስ።

16ሽን ህንተ ሀእ ኦቶርተታነ ጬቀተታ። ሄሳ መላ ጬቆ ኡባይ ኢታ።

17ሄሳ ግሾ፥ ሎኦባ ኦናዉ ኤርሸ ኦና ኡራስ ሄስ ናጋራ።

← Chapter 3 Chapter 5 →