Isaiah 55

Amharic Gofa GFBEVF (ጌሻ ማፃፋ)

1ህንተኖ፥ ሳሞትዳይሳቶ፥ ኡባይ ታኮ ሃ ዪተ፤ ሚሸይ ባይናይሳቶ፥ ሃ ዪተ። ሻምድ ሚተ፤ ሃ ይድ፥ ሚሸ ቃንፆና ጮ ዎይነ ኡሽነ ማ ሻምተ።

2ካ ግዶናባስ ህንተ ሚሽያ አይስ ከሴቲ? ካልሶናባን ህንተ ዎልቃ አይስ ዉርሴቲ? አነ ታና ስእተ፥ ታኒ ኦደይሳ ሀይዝተ፤ ሎኦ ካ ሚተ፤ ሎኦ ካን ህንተ አሳተ ኡፋይስተ።

3“ህንተ ሀይ ታኮ ዛሪድ ታና ስእተ፤ ደኦን ዳናዉ ታ ኦደይሳ ስእተ፤ ታኒ ዳዊታስ ገልዳ ኡፋይሳ ቃላን ህንተና አንጃና።

4ሄኮ፥ ታኒ እያ ካዎተታስ ማርካ፥ ካለይሳነ ሀላቃ ኦስ።

5ጎዳይ፥ ነ ፆሳይ፥ እስራኤለ ጌሻይ ነና ቦንችዳ ግሾ፥ ኔኒ ኤሮና ካዎተታ ፄጋና፤ ነና ኤሮና ካዎተት ኤለስድ ኔኮ ያና።”

6“ጎዳይ በንትያ ዎደ እያ ኮይተ፤ ማታን ደእያ ዎደ እያ ፄግተ።

7ኢታ አስ ባ ኦግያፐ ስሞ፤ ናጋራንቾይ ባ ቆፋ አጎ። ጎዳኮ ስሞ፥ እካ እያ ማራና፤ እ ኑ ፆሳኮ ስሞ፥ እያዉ አቶ ጋና።

8ታ ቆፋይ ህንተ ቆፋ መላ፥ ታ ኦገይ ህንተ ኦግያ መላ ግደና” ያጌስ ጎዳይ።

9ሳሎት ሳኣፐ ቀይሳዳ፥ ታ ኦገይ ህንተ ኦግያፐ፥ ታ ቆፋይ ህንተ ቆፋፐ ቄስ።

10እርነ ሻች ሳሎፐ ዎድ፥ ቢታ ላክስድ፥ ካ ዶላና መላነ አይፋና መላ ኦይሳዳ፥ ዘረይሳስ ዘረ፥ መይሳስ ካ እሞና ጉየ ሳሎ ስመና።

11ታ ዶናፐ ከይያ ቃላይ ሄሳ ማላ፤ እ ታኒ ሀልችዳይሳ ፖሎናነ ታ ኪትዳይሳ ኦና ታኮ ጮ ስመና።

12“ህንተ ኡፋይሳን ከያና፤ ሳሮን ሞይዘታና፤ ደረትነ ዙማት ህንተ ስንን ኡፋይትድ የፃና፤ ባዞ ምት ኡባይ ባንታ ኩሽያ ባቃና።

13አጉን ግሾ ፂዳ፥ ጎምኦረ ግሾ ፃይ ዶላና። ሄስ ጎዳ ቆፍስያባነ መርናዉ ዮና ማላ ግዳና” ያጌስ ጎዳይ።

← Chapter 54 Chapter 56 →