Isaiah 47

Amharic Gofa GFBEVF (ጌሻ ማፃፋ)

1“ባብሎነ ጌላኤ፥ ዱገ ዎዳ ባና ቦላ ኡታ። ባብሎነ ናተ፥ ነ አራታ አጋዳ ሳአን ኡታ። ህዛፐ ጉየ ኔኒ ሳጶትያሮነ ባሎትያሮ ጌተታካ።

2ዎፃ ተቃዳ ካ ጋጫ፤ ነ ጉሉን ቃራ፤ ነ አዱሳ ማኡዋ ከሳ፤ ነ ዎድርያ ቃራዳ ሻፋ ፕና።

3ነ ካሎይ ቃረታና፤ ነ ፖኮይ በንታና። ታኒ ሀሎ ከያና፤ ኦደስካ ቃትከ” ያጌስ ጎዳይ።

4ኑና ዎዝያ እስራኤለ ጌሻ ሱንይ ኡባፈ ዎልቃማ ጎዳ።

5“ባብሎነ ናተ፥ ባዳ ማን ስእ ጋዳ ኡታ፤ ህዛፐ ጉየ ኔኒ ካዎተታ ካውዉ ጌተታካ።

6ታኒ ታ አሳ ሀንቀታስ፤ ታ ላታ ቱንሳስ፤ ታኒ ኤንታ ነ ኩሸን አዳ እማስ። ኔኒ ኤንታዉ ቃታባካ፤ ጭምዳይሳታ ቦላ ነ ዴፆ ቃምባራ ዎዳሳ።

7ኔኒ፥ ‘ታኒ መርናዉ ካዎ ግዳና’ ያጋዳሳ፤ ሽን ነ ኦዳ ኦሱዋነ እያ ዉርሰይ ዋናነኮ ቆፓባካ።

8“ነኖ ዎፑ ጋዳ ኡትዳረነ ናገታዳ ደእዳረ ስአ። ነ ዎዛናን፥ ‘ታፐ አትሽን፥ ሀር ባዋ፤ ታኒ አምኦ ግድከ፤ ዎይኮ የላዳ ናእ ባይና አስ ግድከ’ ያጋዳሳ።

9ሀ ናምኡባት ቆፖና እስ ጋላስ ነ ቦላ ያና። ነ ብታይ አይ ዳርኮካ፥ ነ ሙሩኖይ አይ ዎልቃምኮካ ኔኒ ነ ናይታፐ መላ አተይስነ አምኤተይ አተና።

10“ኔኒ ነ ኢታተን አማነታዳ፥ ‘ኦንካ ታና በኤና’ ያጋዳሳ። ነ ኤራተይነ ጭንጫተይ ነና ባለን፥ ኔኒ ነ ዎዛናን፥ ‘ታፐ አትሽን፥ ሀር ባዋ’ ያጋዳሳ።

11ሽን ኔኒ ዋታዳ ነ ብታን ሃሳኔኮ ኤሮና ኢታይ ነ ቦላ ያና። ኔኒ ጋተ ቃንፃናዉ ዳንዳኦና ዮይ ነ ቦላ ዎና፤ ቃስ ኔኒ አይኮካ ቆፖና ጋዶይ ነ ቦላ ያና።

12“አነ ኔኒ ነ ናአተፈ ዶማዳ ኦሸ ደእዳ ነ ብታነ ነ ሙሩኑዋ ሀእካ ኦ። ኦን ኤር ነ ቆፕዳይሳ መላ ሀናኔኮ ዎይኮ ኔኒ እያራ ዳጋንኔኮ።

13ኔኒ ኤክዳ ዞረይ ኡባይ ዳቡርሳፈ አትሽን፥ ነና አይኮካ ማድቤና። ሳሎ ፆልንቶ ታይበይሳትነ እያ ፄልድ አጌናን አጌናን ሀናናባ ኦደይሳት አነ ነና አሾ።

14ኤንቲ ቡረ መላ፤ ታም ኤንታ ማና። ኤንቲ ታማ ላጩዋፐ ባንታና አሻናዉ ዳንዳኦኮና። አስ ካያ ቦንቆይ ዎይኮ አስ እያ ስንን ኡትድ ሆእያ ታማ ግደና።

15ኔኒ ኤንታራ ዳቡርዳይሳት፥ ናአተፈ ዶምድ ኔራ ዛልእዳይሳት ነዉ ሄሳ መላ። ኤንቲ እሶይ እሶይ ባ ባላን ባላን ኦይከታና፤ ነና አሽያ ኦንካ ባዋ።”

← Chapter 46 Chapter 48 →