Isaiah 37

Amharic Gofa GFBEVF (ጌሻ ማፃፋ)

1ካዎይ ህዝቅያስ ሄሳ ስእዳ ዎደ ባ ማኡዋ ፔድ፥ ካዮ ማኦ ማእድ፥ ጎዳ ኬ ገልስ።

2ካዎ ጋ አይስያ ኤልያቄም፥ ፃፈይ ሼብነ ካለያ ካህነት ካዮ ማኦ ማእድ፥ አሞፀ ናኣ ናብያ እሳያሳኮ ባና መላ ኪትስ።

3ኤንቲ እሳያሳኮ ብድ፥ ህዝቅያስ ሀይሳዳ ያጌስ፦ “ሀ ጋላሳይ መቶ ጋላስ፥ ሴራ ጋላስነ ዬላ ጋላስ። ሄስካ ናእ የለታናዉ ዎደይ ጋክን፥ ባናካዳ የላናዉ ዎልቅ ይዳ ማጫሳ መላ ግድዳ።

4ደኦ ፆሳ ጫያናዳ እያ ጎዳይ፥ አሶረ ካዎይ፥ ኪትዳ ሀላቃ ቃላ ጎዳይ ነ ፆሳይ ስኦና አገና። ቃስ ጎዳይ ነ ፆሳይ ሄ ቃላ ጋሶን እያ ሴሮና አገና። ሄሳ ግሾ፥ አሳ ግዶፈ አታናይሳታስ ዎሳ” ያግዶሶና።

5ካዎይ ህዝቅያስ ኪትዳይሳ እሳያስ ስእዳ ዎደ፥

6ኤንታኮ፥ “ህንተ ጎዳስ ሀይሳዳ ያግድ ኦድተ፦ ጎዳይ፥ ‘አሶረ ካዋ አይለት ታና ጫይሽን፥ ኔኒ ስእዳ ጫሻ ቃላስ ያዮፋ።

7ሄኮ፥ እ ኦዳ ስእድ፥ ባ ቢታ ስማና መላ፥ ታኒ እያ ግዶን እስ አያና የዳና። ያታዳ እ ባ ቢታ ብድ ያን ማሻን ሀይቃናዳ ኦና’ ያጌስ” ያግድ ኪትስ።

8አሶረ ካዎይ ላክሶ ካታማፐ ደንድድ ብዳይሳ አሶረ ሀላቃይ ስእድ፥ ጉየ ስሚድ ካዎይ ልብና ካታማን ኦለተይሳ ደምስ።

9ካዎይ ሳናክሬም፥ “ቶጰ ካዎይ ትርሃቅ ነና ኦላናዉ ይስ” ግያ ኦዳ ስእድ፥ ህዝቅያሳስ ሀይሳዳ ያግድ ኪትስ።

10“ይሁዳ ካዋ ህዝቅያሳ፥ ኔኒ አማነትያ ፆሳይ፥ ‘የሩሳላመ አሶረ ካዋ ኩሸን የገና’ ያግድ ጭሞፎ።

11አሶረ ካዎት ቢታታ ኡባ ዋት ይስዳኮ ኔኒ ስአዳሳ። ያትን፥ ኔኒ አታኔ?

12በን ታ ማይዛት ይስዳ ጎዛና፥ ካራነነ ራፌሳ ቢታ ፆሳትነ ታላሳራን ደእያ ኤደነ ቢታ ፆሳት ሄ ቢታታ ዮፐ አሽዶና?

13ሀማታ ካዎይ፥ አርፋዳ ካዎይ፥ ሳፋርዋይማ ካዎይ፥ ሄና ካዎይነ እዋ ካዎይ አዉን ደኦና?” ያግድ ኪትስ።

14ህዝቅያስ ዳብዳብያ ኪተትዳ አሳፐ ኤክድ ናባብስ። ዳብዳብያ ጎዳ ኬ ኤፍድ ጎዳ ስንን ምጭስ።

15ጎዳ ሀይሳዳ ያግድ ዎስስ፦

16“አቤት ኡባፈ ዎልቃማ ጎዳዉ፥ ክሩበታፐ ግዱዋን ኡትዳ እስራኤለ ፆሳዉ፥ ሳአ ካዎተታ ኡባ ቦላ ነ ፃላል ፆሰ። ሳሉዋነ ሳኣ ኔኒ መዳሳ።

17አቤት ጎዳዉ፥ ነ ሀይ የጋዳ ሃ ስአ። አቤት ጎዳዉ፥ ነ አይፍያ ዶያዳ ሃ ፄላ። ነና፥ ደኦ ፆሳ፥ ሳናክሬም ጫይዳ ጫሻ ስአ።

18“አቤት ጎዳዉ፥ አሶረ ካዎት ካዎተታነ ኤንታ ቢታ ይስዳይስ ኤ ቱማ።

19ኤንታ ፆሳታ ታማን ፁግድ ይስዶሶና፤ ኤንታ ፆሳት ካሰካ አሳ ኩሸይ ማስድ ከስዳ ምነ ሹች ግድያ ግሾ፥ ፆሳታ ግዶኮና።

20ህዛ አቤት ጎዳዉ፥ ኑ ፆሳዉ፥ ነ ፃላል ጎዳ ግደይሳ ሳኣ ካዎተት ኡባይ ኤራና መላ ኔኒ ኑና እያ ኩሸፐ አሻ” ያግድ ዎስስ።

21ሄሳፈ ጉየ፥ አሞፀ ናአይ እሳያስ ህዝቅያሳስ ሀይሳዳ ያግድ ኪትስ፦ ጎዳይ፥ እስራኤለ ፆሳይ ሀይሳዳ ያጌስ፦ “ኔኒ አሶረ ካዋ ሳናክሬማ ጋሶን ታና ዎስዳ ዎሳ ታኒ ስአስ” ያጌስ።

22“ጎዳይ ሳናክሬማ ሀይሳዳ ያግስ። ፅዮነ ጌላእያ ነና ካሱ፤ ለቃሱ፤ የሩሳላመ ናእያ ባ ሁጵያ ቃዳ ነና ቦራሱ።

23ኔኒ ጫይዳይነ ቶችዳይ ኦኔ? ነ ኦደ ቦላ ነ ቃላ ቁ ኦዳ ኦደታዲ? ነ ኦቶሮን ኦና ቁ ጋዳ ፄላዲ? ሄሳ ነ ኦዳይ እስራኤለ ጌሻ ቦላና ግደኔ?

24ኔኒ ኪትዳ አሳ ባጋራ ጎዳ ጫያዳሳ። ሀይሳዳ ያጋዳሳ፦ ‘ታ ዳሮ ፓራ ጋረታራ ቃ ዙማ ሁጵያ፥ ልባኖሰ ዙማ ፄራ ከያስ። ኡባፈ አዱሳ ዝጋታነ ኡባፈ ሎኦ ፂዳታ ቃንፃስ። ቃ በሳን ደእያ ፅትዳ ዎራ ጋካስ።

25ታኒ አላጋ ቢታታን ሃ ኦላ ቦካዳ ሃ እያፐ ኡያስ። ግብፀ ቢታን ጎግያ ሃ ኡባ ታኒ ታ ቶሁዋን የዳ መልሳስ’ ” ያጋዳሳ።

26“ዳሮ ዎደፐ ስን ኔኒ ግምበትዳ ካታማታ ላላዳ፥ ሹቻ ኬላ ከሳና መላ፥ ታ ቆፋ ቃቻ ዎዳይሳ ነ ኤራብኪ? ታኒ ሀእ ኦያ ኦሶታ በን ሀልቻ ዎስ።

27ሄሳ ግሾ፥ ኤንታ አሳስ ዎልቃይ እፅን፥ ኤንቲ ካዉይዶሶናነ ዬላትዶሶና። ኤንቲ ማታ መላነ ዮጋ ጪሻ መላ። ኤንቲ ኬ ሁጰን ዶልያ ማታ መላነ ሌገይ ኩንድስያ ካ መላ ሀንዶሶና።

28“ሽን ኔኒ ኡትያ፥ ከይያ፥ ገልያ በሳነ ታ ቦላ ነ ሀንቀትዳ ሀንቁዋ ኤራይስ።

29ነ ታ ቦላ ሀንቀትዳ ግሾነ፥ ነ ኦቶሩዋ ታኒ ስእዳ ግሾ፥ ታኒ ነ ሲያን ዳፎ አና፤ ነ ዶናን ብፃላ ባርሳና። ያታዳ ኔኒ ይዳ ኦግያራ ነና ጉየ ዛራና።”

30እሳያስ ካዋ ህዝቅያሳኮ ሀይሳዳ ያግስ። “ሄስ ፖለታናይሳስ ማላይ ሀይሳ፤ ሀ ላይነ ዎንቶ ላይ ህንተ አሰቦ ካፅዳ ካ ማና። ሽን ሄን ላይን ህንተ፥ ህንተ ሁጰን ዘርተነ ጫክተ፤ ዎይነ ቶክተነ እያ አይፍያ ሚተ።

31ይሁዳ አሳፐ አትዳይሳት ፃጶ የዳና፤ አይፈ አይፋና።

32አትዳ ጉት የሩሳላመፐነ ፅዮነ ደርያፐ ያና። ኡባፈ ዎልቃማ ጎዳ ቃናተይ ሄሳ ኦና።

33“ሄሳ ግሾ፥ አሶረ ካዉዋባ ጎዳይ ሀይሳዳ ያጌስ። አሶረ ካዎይ ሀ ካታማ ገለና፤ ዎይኮ ሀይሳን ባ ዶንግያ ዱከና፤ ዎይኮ ባ ጎንዳልያ ኦይክድ፥ ሀ ካታማ ስን አና፤ ዎይኮ ካታማ ዩሹዋ ተቀና።

34አሶረ ካዎይ ባ ይዳ ኦግያራ ጉየ ስማና፤ ሀ ካታማ ገለና።” ታኒ ጎዳይ ሀይሳ ኦዳይስ።

35“ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማ አሻና” ያግስ።

36ሄ ቃማ ጎዳ ኪታንቾይ ከይድ፥ አሶረ አሳይ ዱንካንዳ ጉታ ብድ፥ 185,000 አደታ ዎስ። ዎንተ ጋላስ አሳይ ደንድድ አህ አሀ ቦላ ዶረትዳይሳ በእዶሶና።

37ሄሳ ግሾ፥ አሶረ ካዎይ ሳናክሬማ ደንድድ፥ ጉየ ስም ብድ ናናወ ካታማን ኡትስ።

38እስ ጋላስ ሳናክሬማ ባ ፆሳ ንስሮካ ኬን ጎይንሽን፥ እያ ናይት አድራመለክነ ሳርፃር ማሻን እያ ዎድ አራራተ ቢታ ባቃትዶሶና። እያ ናአይ አስራዶን እያ በሳን ካዎትስ።

← Chapter 36 Chapter 38 →