Isaiah 25

Amharic Gofa GFBEVF (ጌሻ ማፃፋ)

1አቤት ጎዳዉ፥ ኔኒ ታ ፆሳ። ታኒ ነና ቁ ቁ ኦና፤ ነ ሱን ጋላታና። ኔኒ ነ ፖሎ አማነተን በንፐ ቆፈትድ ደእያ ማላልስያ ኦሶታ ኦዳሳ።

2ኔኒ ካታማ ላለ ዶረ ኦዳሳ፤ ምኖ ግምበ ድርሳይ ደእያ ካታማ ላላዳሳ። አላጋታ ካዎ ኬይ ዛሪድ ካታማ ግዶና መላ ኦዳሳ፤ ዛሪድ ፖሎ ኬፀተና።

3ሄሳ ግሾ፥ ምኖ አሳት ነና ቦንቻና፤ ዎዛና ምኖ ካዎተታ ካታማት ነዉ ያያና።

4ኔኒ ማንቆይ ባቃትድ አትያ በሲ፥ መቶታንቾይ ቆሰትያ በሲ፥ ኡሾፐ አትያ ገሸነ አዋ ሴላፐ አትያ ኩያ ግዳዳሳ። ዎዛና ምኖ አሳ ሀንቆይ ግምበራ ዶምኤያ ኡሾ መላነ

5መላ ቢታን ሆንገ መላ። ሻራ ኩያይ አዋ ሴላ እርፅስያ መላ ኔኒ አላጋታ የ ስእ ኦዳሳ፤ ያትን ዎዛና ምኖ አሳ ዋሶይ ስእ ግስ።

6ኡባፈ ዎልቃማ ጎዳይ አሳ ኡባስ ሀ ዙማ ቦላ ግታ ግብራ ጊግሳና። ሄ ግብራ ቦላ ሞ አሹዋ፥ ሎኦ ካነ ጫልዳ ዎይነ ኡሻ ጊግስስ።

7እ ሀ ዙማ ቦላ አሳ ኡባ ካምዳ ማጋራጁዋነ ካዎተ ኡባ ቦላ ምጨትዳ ካማ ይሳና።

8እ መርናዉ ሀይቆ ምታና፤ ኡባ ሃርያ ጎዳይ አይፈ ኡባፈ አፉ ቁቻና፤ ባ አሳ ካዉሻ ቢታ ኡባፈ ድጋና። ጎዳይ ሀይሳ ኦድስ።

9ሄ ጋላስ ኤንቲ፥ “ቱማ ሀይስ ኑ ፆሳ፤ ኑኒ እያን አማነትዳ ግሾ እ ኑና አሽስ። ኑ ጎዳይ ሀይሳ፤ ኑኒ እያን አማነትዳ፤ አነ እያ አቶተን ኡፋይቶስ፤ ሀሹ ጎስ” ያጋና።

10ጎዳ ኩሸይ አሻናዉ ሀ ዙማ ቦላ ሸምፓና። ሽን ኡቱል ኡርቃራ ኦላን የተይሳዳ ሞአበይ የታና።

11ሃ ዋይስ ባ ኩሽያ የደይሳዳ ኤንቲ ባንታ ኩሽያ የዳና። ሽን ጎዳይ እያ ገነ ኩሸ ኦሱዋን ጭመቶና፥ እያ ኦቶሩዋ ካዉሻና።

12ኤንቲ ቅስድ ግምብዳ ምኖ ድርሳ ግምብያ እ ዎድሳናነ ካዉሻና፤ እ ዱገ ሳአን፥ ኡባ ህርክ ባናን ሆላና።

← Chapter 24 Chapter 26 →