Ezra 10

Amharic Gofa GFBEVF (ጌሻ ማፃፋ)

1እዝር ፆሳ ኬ ስንን ኩንድድ ዬክሸ ዎስያ ዎደነ ናጋራ ፓፅያ ዎደ ማጭ፥ አደይነ ናእ ደእያ እስራኤለ አሳይ እያኮ ሺቅድ፥ ይባታ ዬሆ እያራ ዬክዶሶና።

2ኤላማ ያራ ግድዳ ይኤላ ናአይ ሳካን ሀይሳዳ ያግስ፤ “ኑኒ ኑ ዩሾን ደእያ አላጋ ማጫሳታ ኤክድ፥ ኑ ፆሳስ አማነትቦኮ። ግዶሽን፥ ሀእካ እስራኤለስ ኡፋይስ ደኤስ።

3ታ ጎዳዉ፥ ኔንነ ኑ ፆሳ ኪታ ናገይሳት ዞርዳይሳዳ ኑኒ ሀ ማጫሳነ ኤንታፈ የለትዳ ናይታ ኡባ የዳናዉ ቃላ ገሎስ። ሄስ ኡባይ ጎዳ ህገይ ገይሳዳ ፖለቶ።

4እዝራ፥ ሀ ኦሶይ ነ ኩሸን ደኤስ፥ ደንዳ፤ ኑኒ ነና ማዳና፤ ምና!” ያግስ።

5እዝር ደንድ ኤቅድ፥ ካህነታ፥ ሌወታነ እስራኤለ አሳ ኡባ ሀ ጌተትዳይሳታ ኦና መላ ጫቅስስ፤ ኤንትካ ጫቅዶሶና።

6እዝር ፆሳ ኬ ስንፈ ደንድድ፥ ኤልያሴባ ናአይ ዮሃን ደእያ ክፍለ ገልስ። ያን ድኦፐ ስምዳ አሳይ ናጋራስ ዬክሸ አቅዳ ግሾ፥ ሄ በሳን ካ ምቤና፤ ሃካ ኡይቤና።

7ድኦፐ ስምዳ አሳይ የሩሳላመ ሺቃና መላ፥ ይሁዳንነ የሩሳላመን አዋጅዶሶና።

8ሀ ሄ ጋላሳታ ግዶን ሄ በሳን ሺቆና ኦንካ ደእኮ፥ እያዉ ደእያባይ ኡባይ ኤከታና መላነ እካ ድኦፐ ስምዳ አሳ ሺቁዋፐ ኩረታና መላ ሀላቃትነ ጭማት ኦዳ ኩይዶሶና።

9ሄ ጌተትዳ ሄ ጋላሳታ ግዶን፥ ኡዱፉን አጌናን ላታማን ጋላሳን ይሁዳነ ብንያመ አሳ ኡባይ የሩሳላመ ሺቅዶሶና። ሀ ዴፆ ኦዳነ ዎልቃማ እራ ጋሶን፥ ኮኮርሸ፥ ፆሳ ኬ ስንን ደእያ ዳባባን ኡትዶሶና።

10ካህነ እዝር ደንዲድ ሀይሳዳ ያግስ፤ “ህንተ አማነቶና እፅደታ፤ አላጋ ማጫሳታ ማቾ ኤክድ፥ እስራኤለ ናቁዋ ቦላ ናቆ ጉጅደታ።

11ህንተ ናጋራ ጎዳስ፥ ህንተ አዋታ ፆሳስ ፓፅተ፤ እያ ኡፋይስያባ ኦተ። ሄ ቢታን ደእያ አይሁደ ግዶና አሳፐነ ህንተ ኤክዳ አይሁደ ግዶና ህንተ ማቸታፐ ሻከትተ” ያግስ።

12ሺቅዳ አሳይ ባንታ ቃላ ቁ ኦድ፥ ሀይሳዳ ያግዶሶና። “ነ ግያባ ኡባ ኑኒ ኦና!

13ሽን ሀይሳን ሺቅዳ አሳይ ዳሮ፤ ሄሳ ቦላ ዎልቃማ እር ቡኬስ። ኑኒ እራፐ አትያ በሲ ሀይሳን ባዋ። ሀ ናጋራን ቆህዳ አሳይ ዳሮ ግድዳ ግሾ፥ እስ ጋላሳን ዎይኮ ናምኡ ጋላሳን ሀ ኦዳ ፖላናዉ ዳንዳኦኮ።

14ሀ ሺቅዳ አሳ ሱንን ኑ ሀላቃት የሩሳላመን ጋምእድ፥ ኮሽያባ ኦ። ሄሳ ጋሶን ደንዳዳ ፆሳ ዎልቃማ ሀንቆይ ኑፐ ስማና ጋካናዉ፥ ኑ ካታማታን ደእያ አይሁደ ግዶና ማጫሳታ ኤክዳ ኡባይ ኬርዳ ቃማን ካታማታ ጭማትነ ዳይናታራ እስፈ የሩሳላመ ዮ።

15አሳሄላ ናአይ ዮናታንነ ተቁዋ ናአይ ያህዝ ኤንታ ቆፋ ጳልቅዶሶና፤ ማሱላምነ ሌወ ግድዳ ሳባት ኤንታና ማድዶሶና” ያግዶሶና።

16ድኦፐ ስምዳ አሳይ ግዳይሳዳ ኦዶሶና። ካህነይ እዝር ኡባ ኮቻታፐ ሀላቃታ ዶርድ፥ ኡባ ኤንታ ሱንን ሱንን ፃፍስ። ታማን አጌናን ኮይሮ ጋላሳን ሀላቃት ኦዳ ፕልግድ በኦ ዶምዶሶና።

17ኮይሮ አጌናን ኮይሮ ጋላሳይ ጋካናዉ፥ አይሁደ ግዶና ማጫሳታ ኤክዳ አሳታ ኡባ ፕልግድ ዉርስዶሶና።

18ካህነ ኮቻታ ግዶፈ አላጋ ማጫሳታ ኤክዳይሳት ሀይሳታ፤ እዮሳደቃ ናአ እያሱ ኮቻታፐነ እያ እሻታ ግዶፈ ማእሰያ፥ አላዛራ፥ ያርባነ ጎዶልያ።

19ኤንቲ ባንታ ማቸታ የዳናዉ ቃላ ገልዶሶና፤ ባንታ ናጋራ ግሾ፥ ዉድያፐ እስ እስ ማራዘ ናቆ ያርሾ ኦድ ያርሽዶሶና።

20እመራ ያራፐ አላጋ ማቸታ ኤክዳይሳት ሀናናነ ዛባዳ።

21ሀርማ ያራፐ ማእሰያ፥ ኤልያሳ፥ ሻማያ፥ ይኤላነ ኦዝያ።

22ፓስኮራ ያራፐ ኤልዮአናያ፥ ማእሰያ፥ እስማኤላ፥ ናትናኤላ፥ ዮዛባታነ ኤልስ።

23ሌወታፐ፥ ዮዛባታ፥ ሳመአ፥ ቃልፃ ጌተትያ ቀላያ፥ ፋታያ፥ ይሁዳነ አላዛራ።

24ዛማረታፐ፥ ኤልያሴባ። ፐንገ ናገይሳታፐ፥ ሳሉማ፥ ፀለማነ ኡረ።

25እስራኤለታፐ፥ ፋሮሳ ያራፐ ራምያ፥ ይዛያ፥ ማልክያ፥ ማያምና፥ አላዛራ፥ ማልክያነ ባናያ።

26ኤላማ ያራፐ ማታና፥ ዛካርያሳ፥ ይኤላ፥ አብዳ፥ ይረሞታነ ኤላ።

27ዛታ ያራፐ ኤልዮአና፥ ኤልያሴባ፥ ማታና፥ ይረሞታ፥ ዛባዳነ አዚዛ።

28ባባያ ያራፐ ዮሃና፥ ሀናና፥ ዛባያነ አትላያ።

29ባና ያራፐ ማሱላማ፥ ማሉካ፥ አዳያ፥ ያሱባ፥ ሻላነ ይረሞታ።

30ፓሀት-ሞአባ ያራፐ አድና፥ ካላላ፥ ባናያ፥ ማእሰያ፥ ማታና፥ ባስልኤላ፥ ብኑያነ ምናሰ።

31ካርማ ያራፐ አላዛራ፥ ይሸያ፥ ማልክያ፥ ሻማያ፥ ስሞና፥

32ብንያመ፥ ማሉካነ ሳማራያ።

33ሀሱማ ያራፐ ማታና፥ ማታታ፥ ዛባዳ፥ ኤልፋላፃ፥ የረማያ፥ ምናሰነ ሳመአ።

34ባና ያራፐ ማዳያ፥ አምራማ፥ ኡላ፥

35ባናያ፥ በዳያ፥ ካልቀ፥

36ዋንያ፥ ማረሞታ፥ ኤልያሴባ፥

37ማታና ማትናያነ ያእሳ።

38ብኑያ ያራፐ ሳማአ፥

39ሰለማ፥ ናታና፥ አዳያ፥

40ማክናዳባያ፥ ሳሳያ፥ ሳራያ፥

41አዛርኤላ፥ ሰለማ፥ ሳማራ፥

42ሳሉማ፥ አማረነ ዮሰፋ።

43ናቦ ያራፐ ይኤላ፥ ማትታ፥ ዛባዳ፥ ዛብና፥ ያዳያ፥ እዩኤላነ ባናያ።

44ሀ ኡባይ አይሁደ ግዶና ማቸታ ኤክዳይሳታ፤ እሶት እሶት ናአካ የልዶሶና።