Deuteronomy 32 — Amharic Gofa GFBEVF (ጌሻ ማፃፋ)

1ሳሎቶ፥ ታኒ ኦደይሳ ስእተ፤ ቢታይ ታ ዶና ቃላ ሀይዞ።

2ታ ትምርተይ እራ መላ ቡኮ፤ ታ ቃላይ አካዳ ዎ። ማታ ቦላ ዎያ ፃሳዳ ዶላ ቦላ ዎያ ፑሰዳ ዎ።

3ታኒ ጎዳ ሱን አዋጃና፤ ግታተ ኑ ፆሳስ እምተ።

4እ ኑ ዛላ፤ እያ ኦሶይ ፖሎ፤ እያ ኦገይ ሱረ። ፆሳይ አማንይሳ፤ ዎርዶይ ባይናይሳ፤ እ ቱማንቾነ ሱረ።

5እያ ስንን ባንታ ቱናተ በስዶሶና፤ ኤንቲ እያ ናአ ግዶኮና፤ ኤንቲ ኢታነ ጌላ የለተ።

6ህንተኖ፥ ኤያነ አኬክ ባይና አሳዉ፥ ህንተ ጎዳስ እምያ ዛሮይ ሀይሴ? እ ህንተና መዳ ህንተ አዋ ግደኔ? ህንተና መድ ምን ኤስዳይ እያ ግደኔ?

7በን ዎድያ ቆፓ፤ አዳ የለተ አኬካ። ነ አዋ ኦይቻ፤ እ ነዉ ኦዳና፤ ጭማታ ኦይቻ፤ ኤንቲ ነዉ ቆንጭሳና።

8ኡባፈ ዎልቃማይ ካዎተታስ ኤንታ ላታ ሻክዳ ዎደ፥ አሳ ዘረካ ዱማይዳ ዎደ፥ እስራኤለ አሳ ታይቡዋ መላ፥ አሳስ ኤንታ ዛዋ ኤስስ።

9ጎዳ ጋክዳ ግሾይ እስራኤለ፤ ያይቆብ እያ ጋክዳ ላታ።

10እ ኤንታ መላ ቢታን፥ አይኮይ ባይና መላ ቢታን፥ ጫርኮይ ባቅሽን ደምስ። እያዉ ጎንዳለ ግድስ፥ እያ ናግስ፤ ባ አይፈ ናኤዳ ምንድ ናግስ።

11አርጋን ባ ናአ ፓሎ ታማርሰይሳዳ፥ ባ ምጭዳ ቀፍያን ጋክድ አሸይሳዳ፥ ጎዳይ ባ ቀፍያን ሀጵድ ኤንታ አሽስ።

12ጎዳይ ባ ፃላላ ኤንታ ካለስ፤ ሀራ አላጋ ፆሲ እያራ ባዋ።

13እ ቢታስ ቃ በሳ ኤንታ ከስስ፤ ጎሻ አይፍያ ኤንታ ሙዝስ። ዛላ ቆጶፐ ኤንታ ኤስ ካልስስ፤ ሹቻ ቢታፈ በንትያ ዛይተ ኡሽስ።

14ኤንታ መህያፐ ቄሳ ማ፥ ዶርሳፈነ ዴሻፐ ፃማታ ማ፥ ሞ ዶርሰነ ዴሻ አሾ ምዶሶና። ባሳነ ዶርሳነ ዴሻ አሹዋ፥ ሎኦ ግስተ ኡይራ ምዶሶና፤ ሱ ዳንያ ዎይነ ኡሻ ኡይዶሶና።

15ሽን እስራኤለይ ኦርድስ፤ ማካልስ፤ ምድ ካልድ ሞሎትስ። ባና መዳ ፆሳ አግስ፤ ባ አቶተ ዛላ ካዉሽስ።

16ኤንቲ አላጋ ፆሳታ ጎይንድ፥ እያ ቃናትስዶሶና። እፀትዳ ባንታ ኤቃታን እያ ሀንቀዶሶና።

17ፆሰ ግዶናይሳታስ፥ ካሰ ኤንቲ ኤሮና ፆሳታስ፥ ዝነ ደንድዳይሳታስ፥ ኤንታ አዋት ጎይንቦና ፆሳታስ ያርሽዶሶና።

18ኤንታዉ ደኦ እምያ ዛላ ዶግዶሶና፤ የልድ ድችዳ ፆሳ አግዶሶና።

19አደ ናይትነ ማጫ ናይት እያ ይሎይዶሶና፤ ጎዳይ ሄሳ በእድ ኤንታ ካስ።

20እ፥ “ኤንቲ ጌላነ አማነቶና ደረ ግድያ ግሾ፥ ታኒ ታ ሶምኡዋ ኤንታፈ ገንና፤ ኤንታ ዉርሰ ስእ ጋዳ በአና” ያግስ።

21ፆሰ ግዶናይሳታን ታና ቃናትስዶሶና፤ ባንታ ኤቃታን ታና ይሎይዶሶና። ታኒ ኤንታ ካትዳ አሳን ቃናትሳና፤ ኤያ አሳን ኤንታ ይሎያና።

22ታ ሀንቆይ ታማዳ ኤፃና፤ ስኦለ ጋካናዉ ፁጋና። ቢታን ደእያባ ኡባ ማና፥ ደርያ ባሱዋ ጋካናዉ ፁጋና።

23“ታኒ ኤንታ ቦላ መቶ ዶራና፤ ታ ዶንግያን ኤንታ ዱካና።

24ታ ኤንታ ቦላ ኢታ ኮሻ የዳና፤ ኤንቲ ሀርገንነ ጋዶን ዉራና። ኤንታ ቦላ ኢታ ባዞ ዶአታነ ዱክድ ዎያ ኢታ ሾሻታ የዳና።

25ኤንታ፥ ማሽ ኦገ ቦላ ዉርሳና፤ ኬ ጋርሳን ዳጋም ካዎታና። ናአተ አደትነ ማጫት ዉራና፤ ጉ ናይትነ ጭማት አቶኮና።

26ታ ኤንታ ይሳናዉነ ኤንታ ሀሳይያ አስ ዶና መላ ኦናዉ ቆፓስ።

27ሽን ኤንታ ሞርከት፥ ‘ፆንዳይ ኑና፤ ሀ ኡባ ኦዳይ ጎዳ ግደና፤ ያግድ ኦቶሮን ጬቀቶና መላ ጋዳ አጋጋስ’ ” ያግስ።

28እስራኤለ አሳይ ዎዛን ባይና አስ፤ ኤንቲ አኬኮኮና።

29ኤንቲ ጭንጭድ አኬክዳኮ ሀይሳ ኤራና፥ ባንታ ዉርሰካ ሻካናሽን።

30ጎዳይ ኤንታ ፆሳይ ኤንታ ባይዞናኮ፥ ኤንታ መዳ ዎልቃማይ አድ እሞናኮ፥ ዋትድ እስ አስ ሙኩሉ አሳ፥ ኑምኡ አስ ታሙ ሙኩሉ አሳ ፆኒ?

31ኑ ዛላይ ኑ ሞርከታ ዛላ መላ ግዶናይሳ ኤንቲ ኤሮሶና።

32ኤንታ ዎይነይ ሶዶመ ዎይንያፐ ዬስ፥ ኤንቲ ጋሞራ ጎሻን ዶልዶሶና፤ አይፍያን ማርዘይነ ጫሞይ ኩምስ።

33ኤንታ ዎይነይ ሾሻ ማርዘ፤ ዎያ ሶጎ።

34ጎዳይ፥ “ታ ሄሳ ዶጋድና? ታ ማዝጋበን ፃፋብክና?

35ኤንታዉ ዮ ጋላስ ማትስ፤ ኤንታ ቦላ ጋካናባይ ኤለሴስ። ሄ ዎደ ኤንታ ቶሆይ በታና፤ ታ ሀሎ ከያናነ ኩሸ ዛራና።”

36ኤንታ ዎልቃይ ዉርዳይሳነ ኤንታ ማድያ አስ ባይናይሳ በእዳ ዎደ፥ ጎዳይ ባ አሳስ ፕርዳና፤ ባ አይለታስ ቃታና።

37ፆሳይ ኤንታኮ፥ “ኤንቲ አማነትያ ኤንታ ፆሳት አዉኔ? ኤንቲ ባቃትድ ቆሰትያ ኤንታ ዛላይ አዉኔ?” ያጋና።

38ኤንታ ሞ ያርሹዋ ምዳይሳት፥ ኤንታ ዎይነ ኡሻ ያርሹዋ ኡይዳይሳት፥ ሀእ ደንድድ ኤንታ ማዶ፤ ኤንታ አሾ።

39“ቱማ፥ ጎድ ታና፤ ፆሲ ታ ፃላላ፤ ታፐ አትሽን፥ ሀራ ፆሲ ባዋ። ዎይነ ፓይ ታና፤ ታ ማዱንፅሳይስ፤ ታ ፓይስ፤ ታ ኩሸፐ ኦንካ አሸና።

40ታ ኩሽያ ደንዳ ሀይሳዳ ያጋና፤ ታኒ መርናዉ ደኦ፤

41ጶልያ ታ ማሻ ሌፋዳ፥ ፕርዳናዉ ታ ኩሸን ኦይክያ ዎደ፥ ታ ሞርከታ ቦላ ታ ሀሎ ከያና፤ ታና እፀይሳታስ ኩሸ ዛራና።

42ታ ዶንገይ ኤንታ ሱን ማታና፤ ታ ማሻይ ኤንታ አሹዋ ማና። ታና እፅያ ኡባ ማርከ፤ ማዱንፅዳይሳትነ ድኤትዳይሳት ሀይቃና።”

43ካዎተቶ፥ ጎዳ አሳራ ኡፋይትተ፤ እ ባ አይለታ ሱ አጫና። ባ ሞርከታ ቦላ ሀሎ ከያና፤ ቢታን ደእያ ባ አሳ ናጋራ አቶ ጋና።

44ሙሰይነ ናወ ናአይ እያሱይ እስራኤለ አሳ ሺሽድ፥ ሀ ማዝሙርያ ኡባ አሳይ ስእሽን የፅዶሶና።

45ሙሰይ ሀ ቃላ ኡባ እስራኤለ አሳስ ኦድ ዉርስዳፐ ጉየ፥

46ኤንታኮ፥ “ሀ ህገ ቃላ ኡባ ህንተ ናይት ናጋና መላነ ኪተታና መላ ሀች ታ ህንተዉ ማርካ ኦዳ እምያ ቃላ ኡባ ህንተ ዎዛናን ዎተ።

47ሀ ቃላይ ህንተዉ ደኦፐ አትሽን፥ ጮ ቃላ ግደና። ህንተ ሀ ቃላ ናግኮ፥ ዮርዳኖሰ ፕንድ ላታና ቢታን አዱሳ ላይ ዳና” ያግስ።

48ሄ ጋላስ ጎዳይ ሙሰ ሀይሳዳ ያግስ፤

49“ሞአበን፥ እያርኮ ካታማፐ ስን ባጋራ ደእያ አባሪማ ዙማታፐ እሱዋ ግድዳ ናቦ ዙማ ቦላ ከያ፤ ያን እስራኤለ አሳ ታ ላትሳና፥ ካናነ ቢታ ሃሆን ፄላ።

50ነ እሻ አሮን ሆራ ዙማ ቦላ ሀይቅድ፥ ባ ማይዛታ ጋክዳይሳዳ ነካ ሀ ዙማ ቦላ ሀይቃዳ ነ ማይዛታ ጋካና።

51ህንተ ናምአይ እስራኤለ አሳ ስንን ታዉ አማነትበከታ። ሲና መላ ቢታን፥ ቃደሳ ማታን ደእያ ማርባ ሃ ማታን ታ ጌሻተ እስራኤለ አሳ በስበከታ።

52ሄሳ ግሾ፥ ኔኒ ሄ ቢታ ሃሆን ፄላናፐ አትሽን፥ ታ እስራኤለ አሳ ላትሳና ቢታ ገላካ” ያግስ።